Fin de Secolo
|
Edission original: |
Giovanni Mazier, Passatempi de Tasi Nane, Venezia, Fratelli Visentini, 1894 |
|
Fonte: |
Indice:Mazier - Passatempi de Tasi Nane, Venezia, Visentini, 1894.pdf |
| ← Sto Secolo | Edission e fonte ▼ | Amor de razza → |
La storia nove pagine
A scriver se prepara
Minga co' nota alegra
Ma co' na nota amara.
Se ga volesto ai popoli
Dar ampie istituzion,
Su cose façilissime
S'à fato confusion.
Su quele mente deboli
In furia preparae
Su cose assae dificili
Per teste riscaldae.
Voludo s'à confonder
Del rico la possanza
Bo' la più vil miseria
S'ha fato una piatanza,
Se ga bandio nel viver
E religion moral,
Se ga perfin al popolo
Tolto quel po' de sal.
Ch'el ben dal mal discerner
Podeva in ogni istante
E che del queto viver
Proprio lo fava amante.
Ancùo, da smania insolita
Sto popol l'anarchia
El sogna da entusiasta
No sa quel ch'el vorìa.
Per questa un miserabile
Un assassin deventa,
No ghe ze azion infame
Che insoma lo spaventa.
De deventar se gloria
Henry o Ravaillac,
Basta per lu suceda
L'ambido patatrac,
Cinismo sol lo domina
Bon senso xe bandio,
O secolo perverso
Che tuto vol finio.
Che de le cose l'ordene
Ancùo vol sia roverso,
Che tuto vol per lu
Opur vol tuto perso,
Povera patria, popoli,
O sacrifizi fati!
Per esser tuti liberi
Se diventadi mati.
Mati dei piü teribili
Da meterve a caena,
Se andemo de sto passo
Tuta la terra è piena.
Povere menti illuse
Nove generazion
Che vedarè sto mondo
Andar a rebalton.
La storia nove pagine
A scriver se prepara
Minga co' nota alegra
Ma co' nota ancora.