Sora la fortuna dei leterati
|
Edission original: |
Raccolta di poesie in dialetto veneziano d'ogni secolo nuovamente ordinata ed accresciuta, Volume unico, a cura de Bartolommeo Gamba, Venezia, G. Cecchini, 1845 |
|
Fonte: |
| Edission e fonte ▼ |
Tuti, tuti sul fogo
Sti libri maledeti.
Quanti che i ze, sbregai vogio che i svola,
E che sia el vin, el zogo,
5Le femene, i pachieti,
Da qua avanti i mii maestri, e la mia scuola.
Quanto ze megio a tola
Passar l'ore coi amici in alegria,
O de una bela tosa in compagnia,
10Che imarcir sora i libri, e vegnir smorti
Per saver quelo che à pensà dei morti.
Cossa serve la testa
Romperse, e lambicarse
Al fin dei fini per saver quatro ache?
15Zela mo cossa questa,
Che merita strussiarse,
E le palpiere aver dal sono strache?
Se al tirar de le slache
Diferenza de sorte no ghe ze
20Tra chi no à mai savesto l'abece,
E quel che à leto vinti librarie,
Mo no zele studiar cogionarie?
Ve ingana chi ve dise
Che 'l studio solo è quelo,
25Che i omeni distingue tra de lori,
Che lu ze la raise
De tuto el bon e 'l belo,
Una semenza che dà fruti e fiori;
Che lu la strada ai onori
30Averze a chi ze nato su la pagia;
O gera perso tra la menuagia,
Che lu mete a l'impar del gran signor
El fio del scoacamin e del pastor.
Sì a un tempo cussì gera,
35El raro e bon talento
Fora del so tugurio el se tirava;
El grande bona ciera
Ghe faceva, e contento
De assisterlo, podendo, el se chiamava.
40Onor soo el lo stimava
Slargar la man co l'omo leterato
Senza vardar come e da chi l'è nato;
Mecenate de Roma el più gran sior
Gera amigo de Orazio e protetor.
45Ma ancuo no più; una sola
Ochiada a dreta o zanca
Deve; cossa vedeu coi vostri ochi?
Osservarè una fola
D'omeni che no manca
50De fondo e de saver, epur pitochi;
Vedarè che i peochi
Sui drapi ghe spassizza a prussission,
No i ga braghesse al culo, nè zipon,
Senza che 'l so saver, e el so aver leto
55Sapia frutarghe un strazzo de paneto.
Bensì el castron cantante,
El bufo, el zarlatan
Coverto d'oro vedarè marchiar;
A l'arpia comediante
60Onori a piene man,
E roba e bezzi, vedarè donar;
Un protetor trovar
Sta sorte de genia no fa fadiga,
Mentre l'omo de inzegno che sfadiga,
65Fusselo un Salamon, ze sul leame,
Sgangolisce dal fredo, e da la fame.
Perchè co son mi nato
Mio pare nol ga dito:
Ti musico voi farte o balarin!
70Gerelo coto o mato
Co gh'è vegnu el prurito
El Limen de comprarme, e 'l Calepin?
Megio assae del latin,
Dei numi, verbi, e mile strigarie,
75Gera insegnarme a ben menar i pie,
0 la solfa a cantar, i trili e i toni
A costo de privarme dei ...
Per poco che riuscio
Fusse a far el bufon
80Gavarave anca mi fato fortuna.
Da milord vestio
Co bordi e guarnizion
Marchià avaria in carozza su la bruna.
No bataria la luna,
85Come che fazzo, a guadagnarme el vito,
Pensier no me daria vestiario e fito;
Me sentirave a dar senza contese
De cavalier el nome, e de marchese.
Ma cossa dighio mai?
90Ah! le bile ze quele
Che zo de carizzada me fa andar.
Che vegna pur portai
I bufoni a le stele,
La virtù benchè nua vorò stimar.
95Oh! degni de onorar
Taconi e sbreghi quando atorno sè
D'un virtuoso, e 'l covrì come podè;
Per mi ve stimo più de quei brilanti,
Che a tanti luse in deo birbi e furfanti.
100De bile e de dispeto
Ti vegnarà acusada,
La mia cara canzon, d'esser un sfogo.
Vero: me bogie in peto
De bile una stagnada,
105Che me farave andar de posta in fogo,
Vedendo l'omo doto ancuo avilio,
E 'l bufon messo in cielo come un dio.