Smara

by Antonio Negri

3 Smara In gondoleta. Barcarole e rime veneziane Co' ti ridi Drio la tendina Antonio Negri 1895 XIX Poesie

Indice:In gondoleta.pdf

Antonio Negri ―  In gondoleta. Barcarole e rime veneziane

Smara

1895

Edission original:	Antonio Negri, In gondoleta, Barcarole e rime veneziane, Milano, Carlo Aliprandi, 1895
Fonte:	Indice:In gondoleta.pdf

←  Co' ti ridi

Edission e fonte ▼

Drio la tendina  →

SMARA¹

---

Dei zorni andemo in cólera
     Fra mi e la mia Nineta,
     E Amor, scandolizzandose,
     Scampa lontan da nu
5Ela, crudel e seria,
     No la vol dar più reta;
     Mi vado sperzurandoghe
     De no vardarla più!
               Pianzè, done sensibili,
               10Sul nostro mal pianzè!...

Mi el tegno el muso,² e 'l palido
     So' viso varda in tera;
     Mi co la coa de l'ocio³
     Vardo quel che la fa....
15La ga segni de lagreme,
     La ga na trista çiera,
     Povera Nina! in gringola
     Per mi più no la va!⁴
               Pianzè, done sensibili,
               20Sul nostro mal pianzè!...

Ela, però, risćiandose
     De vedar se la vardo,
     La trova che insensibile
     Del tuto sta no son....

25Ela tenta de ridarme,
     E mi de più me azardo
     Tornemo amiçi subito
     E Amor deventa bon!
               Sughè, done, le lagreme:
               30Sul nostro ben ridè!

---

1. smara = corruccio.
2. tegner el muso = tener il broncio.
3. coa de l'ocio = coda dell'occhio.
4. in gringola per mi più no la va = non si ringalluzza più per me.