Sie vilani tempo fa
|
Edission original: |
Lodovico Pastò, Poesie edite ed inedite de Lodovico Pastò venezian, scritte nel so natural dialetto, Venezia, Giuseppe Molinari, 1822 |
|
Fonte: |
Indice:Poesie edite ed inedite de Lodovico Pastò venezian.djvu |
| Edission e fonte ▼ |
Sie vìlani, tempo fa,
S'à portà, segondo el solito,
Nel valon dele Frignane1
Per tirar fra quele cane
5El deluvio ai celegati;
E defati i gera a segno
De compir el so dissegno,
Ognun gera ben disposto
Al so posto con ben ordine:
10Celegati, merli, o storni,
Tanto spessi in quei contorni,
Se ne andava saltelando,
Svolazzando in compagnia
A quel ultima osteria.
15Col deluvio molto ben
Xe stà pien, pensè che giubilo!
Ma co i xe tuti a redosso
Del botin, forse el più grosso,
Ch'i abia fato in vita soa,
20In la coa dela gran rede
Ghè chi parla, e no se vede.
Ghè chi ciga fra le celeghe:
Ahi, me sòfego! ahi, me sòfego!
Ose tal, che in tal momento
25Impenisse de spavento
Ogni gramo cazzador,
Nè ghe cuor, nè ghè bravazzo,
Che ressista a un tal spaurazzo.
Tutti scampa, tuti core:
30Xe quatrore, e xe scurissimo;
Ma per bona so fortuna
Sponta fora un fià de luna,
Che ghe mostra un arzerin,
Che è el confin de quel gran logo;
35Là i se ferma, e i bate fogo.
Impizzà che i ga el feral,
Certo tal Zaneto Rucola,
Cola lengua alquanto grossa,
Xe stà el primo a dir qualcosa,
40Ma con pena, ste parole,
Sole, sole: pofardio!
Nu gavemo l'orco drio.
L'orco? un corno, mamaluco!
Dise Cuco, queste è buscare:
45Anca mi son corso via;
Ma per farve compagnia:
No son minga tanto gnoco;
Un aloco gera quelo,
O qualche altro grosso oselo.
50No te posso compatir,
Torna a dir Zaneto Rucola:
Per la verzeneguaria!
Ti è stà el primo a scampar via,
E ti ga po' tento umor?
55Gastu cuor? mi ghe scometo,
Che 'l xe un spirito foleto.
Che 'l sia pur quel, che te piase,
Resta in pase, Cuco seguita,
Chè mi dopo tante stente
60No abandono certamente
Un bocon, che no son degno...
No me tegno, nò persbrio!
Chi ga cuor me vegna drio.
Lo seconda i altri tuti
65Vechi, e puti: Nane Rucola,
Per no star solo, soleto,
Va con lori a so despeto;
Ma disendoghe: fradei,
Quatro aguei ve dono... odio!
70Per pietà tornemo in drio.
No i ghe bada, e co i xe là
I se dà in trequatro l'anemo
De chiapar le corde in man:
Cuco dise: da cristian!
75Che la sorte ne vol ben...
Mo co pien! via lesti pronti,
Quanti osei! se femo conti.
Ma l'oseta giusto alora
Torna sora: ahi, me sòfego!
80Ahi, me sòfego...! per dia!
Chi à più fià, più para via,
No ghe xe chi più li ferma,
Gamba inferma, età avanzada
Tuto svola per la strada!
85Tuti va, nè i sa per quala;
Chi se spala, chi se strupia,
Via sagioti, via capei;
Ghè chi perdé anca i cavei,
Chi se piomba in t'un fosson,
90Chi in gaton sta cufolà,
Chi xe in pie; ma desperà!
Mo che strage! mo che note!
Mo che note oribilissima!
Massabona, che fa zorno,
95E un vilan de quel contorno
Tuti quanti li rancura.
E 'l procura, poverazzi!
De trovarghe dei stramazzi.
Col li à messi tuti a un
100Qualchedun sè fa coragio,
E in do tre con sto bonomo,
E qualche altro galantomo
I se porta dala rede;
Ma no i vede atorno a quela,
105Chè dei fossi de canela.
I l'averze, e i va vardando
E cercando con gran studio,
Se i trovasse la rason
De l'oribile spauron...
110Oe, tasè, che i l'à trovada...
Gran burlada! chi 'l diria?
L'istorieta xe fenia...
Cossa gera mo quel'ose?
„ Che curiose! le gran femene!
115Quelo gera un papagà
Fra le celeghe strucà,
Scampà via dal so paron,
E a l'orbon entrà in la rede...
Le gran cosse che sucede!
- Note
- ↑ Frignane. Vale, o sia basse pradarie d'una gran estenzion nel tegnir dela Vila d'Agna, teritorio Padoan.