Sermon de Nadal
|
Edission original: |
Olindo Guerrini, Le Ciàcole de Bepi, Roma, 1908 |
|
Fonte: |
| ← Introitus | Edission e fonte ▼ | Bon Capo d'ano → |
.jpg)
Et peperit filium suum primogenitum.
Luc. II, 7.
NADAL! Gran zorno! Co' giera putelo,
In sto dì di lasagne e de baldoria,
Tuto bon, me pareva, e tuto belo;
E me sento sonar ne la memoria
Le do campane del mio bel Riese
Che le cantava gloria! gloria! gloria!
E le megio putele del paese
Le spessegava via, coi zocoleti
Sora le calze bianche e ben destese,
Ciacolando de ciassi e de spasseti,
E cantando coi lavri inamorai
Come un branco de passare sui teti;
E da tuti i foghèri zà impizai,
Se spandeva un profumo apetitoso
De fritole bogienti e buzolai.
Oh, el capon de cà mia! Con che amoroso
Recordo, penso co'l vegniva in tola,
Come in trionfo, tènaro e sugoso!
Dio, perdonime sto pecà de gola,
Ma un capon come quelo, in vita mia
No lo go mai più visto in cazzarola!
E no go più trovà quel'alegria
Che me rideva in cor serenamente
Come un fresco fiorir de poesia!
Sarà che alora no capiva gnente
De frati, nè de preti, nè de ciese,
Che giera ancora un fio puro e innocente,
Ma l'umile Nadal del mio paese
Vivo ancora lo gò ne la memoria,
E sento le campane de Riese
Che canta gloria! gloria! gloria!
Gloria al Signor in cielo e pase in tera
Ai omini de bona volontà,
Dato e suposto che no i sia in galera,
Perchè queli che vedo in libertà,
I xe un branco de ladri e de baroni,
Che Dio ghe manda... quel ch'el credarà.
Nadal! Nadal! Mo no saveu, paroni,
Che adesso el xe per mi passion e morte,
O un calvario, o un inferno... Mo mincioni!
No posso più! Un martirio de sta sorte
Toca a un povaro prete de campagna,
Per un sempio caprizzo de sta Corte
Dove tuti i me crìa! Questo el se lagna
Perchè gò desgustà tropi Governi
E gò perso la Franza co la Spagna;
Un altro me minazza i foghi eterni,
O per via de Loreto o de Pompei,
O perchè cala el prezzo de le Terni;
Tizio protesta coi banchieri ebrei,
Caio protesta per quei quattro rami
De pini e ziga come fa i putei.
E co stufo de zighi e de reclami
Me sento, vien un saco de badesse
A confessarse de pecati infami...
Questo xe el mio Nadal, che me rincresse
Se ghe lo digo in confidenza a lori,
Ma ghe n'ò piene, digo, le braghesse.
Basta, lassemo andar che i xe dolori,
Mentre de tuto cor fazzo i auguri
A chi scrive el Travaso, ai so letori
E a tuti quanti... fora che a Don Muri.