Pagina:Le Ciàcole de Bepi, Roma 1908.pdf/16

SERMON DE NATAL.

Et peperit filium suum primogenitum.

Luc. II, 7.

I.

NADAL! Gran zorno! Co' giera putelo,
     In sto dì di lasagne e de baldoria,
     Tuto bon, me pareva, e tuto belo;

E me sento sonar ne la memoria
     Le do campane del mio bel Riese
     Che le cantava gloria! gloria! gloria!

E le megio putele del paese
     Le spessegava via, coi zocoleti
     Sora le calze bianche e ben destese,

Ciacolando de ciassi e de spasseti,
     E cantando coi lavri inamorai
     Come un branco de passare sui teti;

E da tuti i foghèri zà impizai,
     Se spandeva un profumo apetitoso
     De fritole bogienti e buzolai.