Senti, Nina, che sogno traditor

by Gian Giacomo Mazzolà

3 XCI I cavei de Nina XC XCII Gian Giacomo Mazzolà 1785 XVIII

soneti

Gian Giacomo Mazzolà ―  I cavei de Nina

XCI

1785

Edission original:	Collezione delle migliori opere scritte in dialetto veneziano, Volume quarto: Poesie di Gio. Giacomo Mazzolà e di Lodovico Pastò, a cura de Bartolommeo Gamba, Venezia, al negozio di libri all'Apollo, dalla Tipografia di Alvisopoli, 1817
Fonte:	Indice:Collezione delle migliori opere scritte in dialetto veneziano 4.djvu

←  XC

Edission e fonte ▼

XCII  →

XCI

Senti, Nina, che sogno traditor.
     Za dormiva, ma d'esser me parea
     In certi lioghi che no ghe n'ò idea;
     4E in quel che i vardo, comparisse Amor.

Ti pol rafegurarte el me stupor;
     La to Coa el gavea in man, o la parea,
     Tanto la gera longa, e la spandea
     8Tanto come la toa, lustro e splendor.

Ghe vago incontro alegro che mai più,
     E co' son per basarla e tiorla in man,
     11Lu core via, e mi coro drio de lu.

E cori e cori, infin mi son cascà,
     E dal colpo e dal rider de quel can,
     14Me son col fiel sui lavri desmissià.