Riflession semi-patetiche de uno in cimbalis!
|
Edission original: |
Giuseppe D'Alpaos, Svoladine e refoli, Venezia, Fratelli Visentini, 1897 |
|
Fonte: |
Indice:D'Alpaos - Svoladine e refoli, Venezia, Visentini, 1897.pdf |
| ← Amor! amor! amor! | Edission e fonte ▼ | Un qui pro quo → |
L'istà coi gran calori
Ga fato i so furori
E 'desso càpita
L'inverno che bel belo
Porta la neve, el gelo
E tanti incomodi!...
Peraltro, sta stagion,
La ga el so lato bon
Incontrastabile...
De fato... al sotoscrito,
Cresse, co l'apetito,
L'estro poetico!...
Del bonumor la vena,
Col fresco... e a panza piena
La vien più facile!...
L'istà, da poetessa
Fa la natura stessa
Che xe più pratica...
Varda nel Magio ardente
Come la xe eloquente...,
Senza far ciacole!...
Ma 'desso, povareta,
La dorme, la xe quieta...,
No dismissiemola!...
Ela za più no vede
Quelo che qua suçede...,
Dunque ris'cèmola!
Tolemo su la Lira
Za che la Musa inspira...
A dir su bùzare!
A dirve, per esempio,
Che no xe miga un sempio
Quelo che giudica
Che per el corpo uman
El fredo sia più san
De la canicola!
L'inverno, andando in leto,
Ti sa de dormir quieto!...
No ghe xe pulisi,
Nè çimesi e mussati
Che fa deventar mati
Anca i filosofi!
A tola ti te godi;
Ti digerissi i ciodi.....
Se ti li màsteghi!...
Al pozzo e a l'aquedoto
Ti preferissi el goto...
Magari al Bàcaro!
Ti meti su la polpa
Andada via per colpa
Del tropo sòfego!...
In conclusion, mi vedo
Che quando torna el fredo
Se stà benissimo!
Torna a fiorir le rose...
Sul viso de le tose
Che gera pàlide!
Par che le gabia el fogo
In torno e in ogni logo...
El più recòndito!
Quando le te aviçina...
Le serve da cusina
Extra-economica!
E le te dà el calor;
Ele t'impizza el cuor,
Le te lo fulmina!
Insoma, se l'inverno
Cussì durasse eterno...
Sarìa un'America
Per quei che la Fortuna
Ga conossudo in cuna...,
Mentre un suplizio
Saria per quela zente
Che no ga bùo mai gnente...
Altro che làgreme!...
Se la stagion del gelo
Go decantà..., credèlo,
Xe la mia massima
De parlar ben de tuto...
Anca del tempo bruto...
Quando so' in cimbalis!