Quel baso

Da Wikisource
Jump to navigation Jump to search

EPUB silk icon.svg EPUB  Mobi icon.svg MOBI  Pdf by mimooh.svg PDF  Farm-Fresh file extension rtf.png RTF  Text-txt.svg TXT
75%.svg
Qualità del testo: sto testo el xe conpleto, ma el gà ancora da vegner rileto.
[p. 7 modifica]
Levi - Versi in dialetto triestino (page 7 crop).jpg



Quel baso


     Quel baso me scota
Me brusa la boca,
E qua nele recie
Go ancora la s’cioca.

     De sveio, se dormo,
Se parlo, se taso,
Rosina mia bela
Mi sento quel baso.

     O Dio che delizia!
O Dio che profumo!
No xe miga vero
Che el baso xe un fumo!

     No xe miga vero,
La xe una busia,
Che co una forbida
El baso va via.

[p. 8 modifica]


     Dal giorno del baso
Xe un mese passà;
Me son ben forbido,
Ma el baso xe qua.

     Lo sento, lo gusto
Con l’anima in gola,
Lo go sula boca
Tacà ch’el consola!

     Quel baso xe un balsamo,
Quel baso xe un fogo,
Xe fiama, xe vampa,
Xe incendio, xe rogo.

     Quel baso xe vita,
Xe luse, calor,
Quel baso, Rosina,
Xe palpito e amor.

     El ziel me ga verto
Quel baso improviso,
Compagna delizia
No i ga in paradiso.

     E se in tera un angiolo
Svolassi per caso,
Cambiarse in un omo
Voria per quel baso.

     Le anime nostre
Sentindo la s'cioca,
Xe corse de fuga
A fior dela boca.

     E senza far strepito
Le se ga abracià
E in una sol anima
Unì le se ga.

Traesto fora da Wikipèdia - L'ençiclopedia łìbara e cołaboradiva in łéngua Vèneta "https://vec.wikisource.org/w/index.php?title=Quel_baso&oldid=69203"