Quadreto... musical
|
Edission original: |
Raffaello Michieli, Musa Maliziosa, Libreria Filippi Editrice, 1915 |
|
Fonte: |
http://invenessian.blogspot.com/2010/01/raffaello-michieli-rafa.html |
| Edission e fonte ▼ |
Formando un bel quadreto
Maria col tenentin
filava un amoreto
in t'un bel salotin.
5Sentada al piano, intanto,
l'amiga la vardava,
e scherzando con un guanto
coi oci la parlava.
E mentre da Marieta
10st'altro aspetava el... Si
st'altra co na smorfieta
diseva: vien da... Mi.
E per dirghela in musica
al tenentin Cocò
15la ga co le man docili
sonà: Mi – Si – La – Do!