Primavere

by Berto Barbarani

3 Primavere I due canzonieri I due canzonieri/Libro I - El rosario del cor A i asili Berto Barbarani 1895 XIX Soneti veronese

Indice:Berto Barbarani, I due canzonieri, 1917.pdf

Berto Barbarani ―  I due canzonieri  ― Libro I - El rosario del cor

Primavere

1895

Edission original:	Berto Barbarani, I due canzonieri, Verona, P. Apollonio, 1917
Fonte:	Indice:Berto Barbarani, I due canzonieri, 1917.pdf

Edission e fonte ▼

A i asili  →

PRIMAVERE.

     Quà, i è fate così le primavere:
de foie verde e tènare, de ciari,
de gropeti de fior de mandolari,
de puteleti che fa su bandiere.^[1]

     De facie bianche, co le tresse nere,
... de oci grandi, sensa calamari,^[2]
de veci alegri che no trova amari
i so ani, che pesa come piere.

     E i giovinoti i spera ne i mostaci,
e le putele spera nel moroso,
e i mostri^[3] i siga a piè par tera: laci!...^[4]

     Laci, che gusto, nassa quel che nassa,
andar co una putela via de sfroso,^[5]
e dirghe: «Cica» a tuti quei che passa!

---

Note

1. bandiere: aquiloni, cervi volanti
2. calamari: il cerchio a gli occhi
3. mostri: monelli
4. laci: esclamazione di giubilo che si sente spesso in bocca a i monelli veronesi
5. de sfroso: di nascosto.