Pentio d'aver incauto
|
Edission original: |
Raccolta di poesie in dialetto veneziano d'ogni secolo nuovamente ordinata ed accresciuta, Volume unico, a cura de Bartolommeo Gamba, Venezia, G. Cecchini, 1845 |
|
Fonte: |
| Edission e fonte ▼ |
Pentio d'aver incauto
Abandonà el to amor,
Mi me sentiva a struzer
4Da smania, da dolor;
E me credea, tornandote
El cuor a tributar,
D'aver la quiete a l'anima
8Ancora da tornar,
Ma invece son più misero
De quel che gera prima;
Più no me posso iluder:
12De mi no ti fa stima,
No trovo quel sensibile
Che pur ti vanti in ti,
El mio servir xe inutile,
16No gh'è pietà per mi;
E sol ti godi a vederme
Cascà come un cocal,
A sospirar, a pianzer
20El mio destin fatal.
D'un cuor che pur xe docile,
Volesto ti à trionfar,
E renderlo ridicolo
24Del proprio so penar.
Ti me vol dar da intendere
Che no ti ga altri amanti,
Ma no so mato a crederte,
28Come che gera avanti.
Ti ga, cussì no fussela,
El caro to Tonin,
Che tute l'ore assiduo
32Te sta sempre vicin.
Lo vedo ch'el te cocola,
Che ti ghe porti afeto,
Mi mai te vago a genio,
36Tratà son per dispeto;
No posso star un atimo
Con ti da solo a sola,
Nè senza testimonio
40Te posso dir parola.
Per elo no te stimola
Inutili riguardi;
Per mi è delito massimo
44Se apena ti me vardi!
Ah Nina, no so semplice,
Capisso chiaramente:
Tonin xe el to bel idolo,
48Mi son un biltri, un gnente.