Pensieri tristi

by Attilio Sarfatti

3 XXIV. Pensieri tristi
(a Cesare Augusto Levi) Rime veneziane Libro Secondo XXIII. A Paulo Fambri XXV. El povaro barcarol Attilio Sarfatti 1892 XIX

poesie

Attilio Sarfatti ―  Rime veneziane  ―  Libro Secondo

XXIV. Pensieri tristi
(a Cesare Augusto Levi)

1892

Edission original:	Attilio Sarfatti, Le Rime Veneziane e Il Minuetto, Milano, Fratelli Treves Editori, 1892
Fonte:	Indice:Le Rime Veneziane e Il Minuetto.djvu

←  XXIII. A Paulo Fambri

Edission e fonte ▼

XXV. El povaro barcarol  →

XXIV.

PENSIERI TRISTI

(A CESARE AUGUSTO LEVI)

Quando la bianca neve
Coverze strade e case,
E tuto quanto tase
4Soto quel drapo greve,

E un çimitero imenso
Par sta Venezia mia,
Pien de malinconìa
8Ai povareti penso.

Penso a chi pena drento
Stamberghe umide e scure,
Piene de crepadure,
12Mal riparae dal vento;

A quei, che, senza leto,
Zira de strada in strada,
E in cao de la zornada,
16Se sfama co' un paneto;

Ai amalai che vegia
Dal mal dì e note, e sente
Urlar de fame arente
20La povara famegia;

A quei che spera e prega,
A quei che, tra i dolori,
Bestemia contro i siori,
24Dio maledisse e nega,

Penso, e per aria intanto
La bianca neve zira,
Portando a chi sospira
28Disperazion e pianto.