El povaro barcarol

Da Wikisource
Jump to navigation Jump to search

EPUB silk icon.svg EPUB  Mobi icon.svg MOBI  Pdf by mimooh.svg PDF  Farm-Fresh file extension rtf.png RTF  Text-txt.svg TXT
75%.svg
Qualità del testo: sto testo el xe conpleto, ma el gà ancora da vegner rileto.
XXV. El povaro barcarol
(a Enrico Castelnuovo)
1892
←  XXIV. Pensieri tristi Edission e fonte ▼ XXVI. El terno de la sonambula  →
[p. 107 modifica]
XXV.


EL POVARO BARCAROL

(A ENRICO CASTELNUOVO)

1


Drìo San Zorzi, là in fondo, un barcarol,
Se afana e voga come un disperà.
Nuvole negre za coverze el sol,
Minaçia el çielo en temporal d'istà.

Eco lampi saete piova e toni,
Supia el vento e se ingrossa in nuvoloni.

El barcarol da 'l tempo spaurìo,
Se buta in zenocion e prega Dio.

[p. 108 modifica]


2

Tre fioi lo aspeta a casa e la muger,
Che senza de lu de fame morirìa.
El poco pan del povaro mistier,
Anca quelo doman ghe mancarìa.

Solo, sbatuo da l'onde, in quel'inferno,
Ogni minuto ghe par longo eterno,

La morte el vede perso in quel'oror,
Co' la disperazion sul viso e in cuor.

3

El tempo fa teror: i cavaloni,
Montagne d'aqua, s'alza infurïai.
Tremar fa i lampi, trabalar i toni,
Tempo più orendo non s'à visto mai!

Bianco, senza speranze, el barcarol,
Prega, ziga, se afana più ch'el pol.

Nissun lo sente, e una tremenda ondada
Lo slanza in mezo a l'aqua indemoniada.

[p. 109 modifica]


4

El zorno dopo (un bel zorno de sol)
A Malamoco morto i l'à trovà.
Nissun più conosseva el barcarol,
Sgionfo, negro, dai granzi rosegà.

E la muger e i fioi, che lo spetava,
Vardando el çielo intanto ciacolava:

"Forse Bastian sarà via co 'l batelo.
Magari pur durasse el tempo belo!"

Traesto fora da Wikipèdia - L'ençiclopedia łìbara e cołaboradiva in łéngua Vèneta "https://vec.wikisource.org/w/index.php?title=El_povaro_barcarol&oldid=49097"