Parla el mulo Tunin
|
Edission original: |
Augusto Levi, Versi in dialetto triestino, Trieste, Caprin, 1915 |
|
Fonte: |
| ← Abandonai | Edission e fonte ▼ | Tombola → |
Mi per el studio no go zerto amori
E no me importa de restar un mus,
Al pandolo, ale lavre e se go bori
In logo sconto un colpo de bancus.
Me la blangio saltar per le batele,
Far dispeti ala gente, tirar scoi,
Andar sonar de sera campanele,
In trapola ciapar i pagnaroi.
D'istà, discalzo corer per la strada,
Ale done del pan becar la biga,
De quando in quando far una nudada
Coi vestiti in mastela fin la diga.
Co capita le guardie, come mami
Le resta nel veder sta furberia,
— Ciò mulo! ma va là, lasso che i dami,
Svelto come un dolfin ghe filo via!
Co vegno in tera po, sbati sior Ana
Che magnaria, ve giuro mi, per trenta,
E magno come un lupo; xe una mana
Quei fasioi, quele fete de polenta.
Xe un truco co mia mare la me manda
A far spesa in botega magnativa:
Fa presto, sa Tunin, la racomanda,
E mi, come un gardel ciapo la briva.
La fiasca de oio scondo drio el porton,
E coi bori che go vado a zogar,
Co torno a casa ciapo un scopazon,
Pianzo e me fazo presto perdonar.
Ti finirà in preson, mostro de mulo!
La va zigando da matina a sera,
Mi rido, per un poco fazo el bulo;
Po penso che la disi cossa vera.
Ma no go colpa mi, no go papà,
Mia mama per le case fa servizi,
Son sempre solo, sempre abandonà,
E no go colpa mi se go sti vizi.
. . . . . . . . . . . . . . . . .
Ma più dolor no voio darte, mama,
Vien, dame un baso, fame sto piazer,
Sento l’afeto che per ti me infiama,
Metime mama, dai, far un mestier.