Onomastico
|
Edission original: |
Olindo Guerrini, Le Ciàcole de Bepi, Roma, 1908 |
|
Fonte: |
| ← Epifania | Edission e fonte ▼ | Aegri somnia → |
.jpg)
Cui nomen erat Joseph
de domo David.
Luc. I, 27.
ME inzenòcio al to cospeto,
Patriarca rasegnà,
Che nel ventre benedeto
El Signor te gà portà,
Ma col debito rispeto
A la to verzinità,
Vecio mio, me maravegio
De sti fiori sul to segio!
Sant'Isepo, bon mario,
E paziente marangon,
Che ti onori el nome mio
E la santa religion,
Si ben qua i me ciama Pio,
Mi no cambio divozion:
Gavarò fina che crepo
El to nome, o Sant'Isepo!
Sto bel nome el xe una prova
De grandeza e de virtù,
Una stela vecia e nova
Che risplende sempre più.
Garibaldi! E chi me trova
Un eroe compagno a lu?
E Mazini e Verdi e tanti
Galantomini e birbanti?
El pudor de Isepo Eoreo
Nol xe un dogma; fiol d'un can?
La mugièr da Mardocheo
Ghe tirava el palandran;
Ma lu gnente, marameo,
Gà impiantà dona e gaban...
Un gaban che, mi che parlo,
Gavaria pensà a lassarlo!
Ma ti, vecio Patriarca,
Ti xe primo in santità,
Perchè a piè, a cavalo, in barca,
Come un Dio ti xe scampà
Da quel perfido Monarca
Luteran, che gà tentà
De magnarse vivo vivo.
El to erede putativo.
E sti preti i me gà dito
Le to pene, el to sudor,
Co' a ramengo e derelito,
Col somaro e col Signor,
Ti ziravi per l'Egito,
Che no ghe gnanca el vapor,
Nè un cafè, nè un ostaria,
Per la Verzene Maria!
Quante volte vecio caro,
Penso a ti, dopo disnar
E te vedo col somaro
Nel deserto a zopegar,
Senza un strazzo de tabaro
Ne tabaco da fumar...
Mi che magno senza spesa
El pan bianco dela Chiesa!
E te vedo, povareto,
Col putelo spaventà,
E Maria che ghe dà el peto
Con decenza e carità;
E 'l somaro benedeto
Che scalziza in libertà...
Libertà! Che nome caro!
Se anca mi fosse un somaro!!
.jpg)