Aegri somnia
|
Edission original: |
Olindo Guerrini, Le Ciàcole de Bepi, Roma, 1908 |
|
Fonte: |
| ← Onomastico | Edission e fonte ▼ | Seminarium → |
.jpg)
O fortunatos nimium, sua si bona norint, Agricolas!
Virg. Geor., II, 458.
VARDA el to servitor, Dio benedeto!
Abi pietà de mi, caro Gesù!
Xe tanti zorni che suspiro in leto,
Xe tante noti che non dormo più.
E passo el tempo mio vardando el trave
O i fiochèti del sacro baldachin,
Che xe intagiài de simboli, de ciave,
De Padri Eterni e de Gesù Bambin.
E in st'ozio desolà che me martoria,
In sto misero leto del dolor,
Trope cose me vien ne la memoria,
Tropi recordi che me giazza el cor!
O zugno alegro! E adesso cossa fale
Le mie povare zente de Salzan?
Cântele al sol gnancòra le zigale?
Xelo za grosso ne la spiga el gran?
E ne la casa nostra de Riese
Le rondene fa el nio soto al grondal?
Oh! come un fià de odor del mio paese
Saria balsemo vero a sto mio mal!
Oselin che ti canti su la rama,
La rama verde de la zoventù,
No sèntistu el to Bepi che te ciama?
Sàstu che no te sentirò mai più?
Te canti e no te sa che vita vivo,
Senza un respiro mai de libertà
E che de bon son deventà cativo,
E che perdo la santa carità!
Povera mama mia che la credeva
Col farme prete de mandarme in ciel,
In che vani pensier la se perdeva,
Che gò desmentegà squasi el Vangel!
Ah perchè — lassè dunque che me lagna! —
Non son restà nel picolo poder
Coi zòcoli de legno là in campagna
Ma con l'anema bona e 'l cor sincer?
Deme la falze in man come una volta,
L'erba xe verde e tenera nel prà,
Le giozze del suòr fa la raccolta...
Dème una vanga in man per carità.
E in malòrsega sia st'ozio del leto,
St'inchini, sti fiocheti e sto latin!
In malòrsega sia! che gò nel peto
Ancora el vecio cor del contadin!
Tole sto pastoral, che ve lo dono,
Segno van d'una vana autorità;
Deme una zapa e tachè fogo al trono,
Che sarà megio per la società!