Nona

by Ferruccio Piazza

4 Nona Ferruccio Piazza XX Poesie triestin

Indice:Trieste vernacola.djvu

Ferruccio Piazza

Nona

XX secolo

Edission original:	Trieste vernacola, Antologia della poesia dialettale triestina, a cura de Giulio Piazza, Milano, Casa Editrice Risorgimento R. Caddeo & C., 1920
Fonte:	Indice:Trieste vernacola.djvu

Edission e fonte ▼

NONA.

Nona, ti te ricordi! Ti te ricordi, nona,
Quando che iero picio e vignivo pianin
Ne la tua camereta, davanti 'l tavolin,
E metevo un scagneto¹ vizin la tua poltrona?

E ti te me vardavi de sora dei ociai,
Ti lassavi la calza, ti te sufiavi 'l naso,
E po ti te sbassavi per poder darme un baso,
E mi pronto disevo: «Nona, una fiaba... dài!»

E ti ti cominciavi: «Una volta ghe iera
Una regina bela e bionda come l'oro,
E un principe de Spagna voleva sto tesoro...
E con quel de l'Oriente el se ga messo in guera».

E po ti la giravi² e ti vignivi fora
Con nani gobi e storti ma boni come 'l pan,
Con draghi che gaveva sie teste e diese man,
E co ti la finivi, mi te disevo: «Ancora!»

Nona ti te ricordi? 'ssai tempo xe passà!...
Ogi son quasi un omo; e co vegno a pianin
Nela tua camereta, davanti 'l tavolin,
Rente³ la tua poltrona, come vinti ani fa,

Ti xe ti che ti disi: «Conta qualcossa, dài!»
E mi te conto alora quel che go drento 'l cor,
La fiaba tanto bela, la fiaba del mio amor...
E ti ti pianzi intanto de soto dei ociai.

«Senti, perchè ti pianzi, nona?» te digo alora,
E su de ti me sbasso per poder darte un baso;
Ti pronta ti soridi, po ti ti sufi 'l naso,
Ti pari via le lagrime⁴ e ti me disi: «Ancora!»

---

Note

1. scagneto, piccolo scanno, sgabello
2. e po ti la giravi, e poi davi un altro giro al tuo racconto
3. rente, vicino.
4. ti pari via le lagrime, discacci le lagrime.