Nineta, el cuor me bagola (1817)

by Giovanni Battista Bada

3 Canzonetta Giovanni Battista Bada XIX Canzonete

Indice:Collezione delle migliori opere scritte in dialetto veneziano 12.djvu

Giovanni Battista Bada

Canzonetta

XIX secolo

Edission original:	Collezione delle migliori opere scritte in dialetto veneziano, Volume duodecimo: Poesie di autori diversi, a cura de Bartolommeo Gamba, Venezia, al negozio di libri all'Apollo, dalla Tipografia di Alvisopoli, 1817
Fonte:	Indice:Collezione delle migliori opere scritte in dialetto veneziano 12.djvu

Edission e fonte ▼

III. CANZONETTA

Nineta; el cuor me bagola
     Da l'alegrezza estrema,
     E tanto son estatico,
     4Che d'insognarme ò tema.
Me par squasi impassibile
     D'esserte al fianco ancora;
     Dopo d'averte, incauto,
     8Lassà per mia malora.
No gera mai credibile
     Che dopo un abandon
     De tanto tempo, a dirtela,
     12Trovasse compassion.
Epur, Nineta amabile,
     Scordando el mio traviar,
     Ti ga pietà d'un misero,
     16E ti lo torni a amar.
Pazienza, se contrario
     Me gera prima Amor,
     Se tanto ancuo propizio
     20Lo trovo a mio favor.
Za no podeva vederme
     Al fianco de nessuna,
     El che xe stà preludio
     24De tanta mia fortuna.

Ma la fortuna è instabile;
     Nè dura sempre el ben,
     E no vorìa che 'l netare
     28Cambiasse po in velen.
Temo che ancora l'anima,
     Cara Nineta mia,
     Come ti vanti, libera
     32Del tuto, oimè! no sia;
Temo un amor residuo
     De quel che ancuo ti abori,
     Perchè a parlar ti esageri
     36Co' d'elo ti discori.
Nineta, no te ofender
     De sto mio gran sospeto,
     Perchè el timor de perderte
     40Xe prova del mio afeto;
E quel amor conservime
     Che ti me mostri adesso,
     Che mì, cara mia cocola,
     44Co tì farò l'istesso.