Nina-nana (Riccardo Selvatico)

EPUB

MOBI

PDF

RTF

TXT

Qualità del testo: sto testo el xe conpleto, ma el gà ancora da vegner rileto.

Riccardo Selvatico

Nina-nana

XIX secolo

Edission original:	Riccardo Selvatico, Commedie e Poesie Veneziane, a cura de Antonio Fradeletto, Milano, Fratelli Treves editori, 1910
Fonte:	Indice:Selvatico - Commedie e Poesie Veneziane, Milano, Treves, 1910.pdf

Edission e fonte ▼

[p. 262 modifica]

NINA-NANA.

Andemo, vissere,
     Sera i to ocieti,
     Fin che mi resto
     Per sti intrigheti;
     Za fasso presto!
     E co li termino,
     Subito mi
     Vegno co’ ti.

In cheba, vardilo,
     Fin l’oseleto
     El xe una bala
     Col so becheto
     Soto de l’ala;
     Via dunque subito
     Fa come lu,
     No pianzer più.

Questi che tugola
     Sora l’altana,
     Xe colombini
     Che fa la nana
     Ai so putini;
     E se le bestie
     Le fa cussì,
     Dormi anca ti.

[p. 263 modifica]

Po’ se ti buleghi
     Tanto sul leto,
     Ti sa che arente
     Ne stà el vecieto
     E ch’el te sente;
     Che s’el ne capita
     De suso lu,
     Povari nu!

Via, dunque, scondite,
     Fìchite soto:
     Dormi amor mio,
     Che za deboto,
     Varda, ò finio;
     No vôi che meterte
     Sto taconsin
     Sul to abitin.