Mar nostro

by Maria Pezzè Pascolato

3 Mar nostro Versi Veneziani Fiume A Venezia Maria Pezzè Pascolato 1928 XX Poesie

Indice:Pascolato - Versi Veneziani, Milano, 1928.pdf

Maria Pezzè Pascolato ―  Versi Veneziani

Mar nostro

1928

Edission original:	Maria Pezzè Pascolato, Versi Veneziani, Milano, 1928
Fonte:	Indice:Pascolato - Versi Veneziani, Milano, 1928.pdf

←  Fiume

Edission e fonte ▼

A Venezia  →

MAR NOSTRO.

M

ar nostro, co te vedo tuto lisso

     Tuto quieto int'un slusor d'arzento,
     Quela pase in te l'anima no sento,
     E più ti me par belo, e più patisso.

Co ti xe tuto furia, e urli, e spiuma
     Che toca el cielo nero cofà ingiostro,
     Alora te capisso, sì, mar nostro,
     E la to rabia drento me consuma.

Vien su ruzori e toni dal profondo,
     De siluri, de mine, de canoni;
     Sento el lagno dei morti: —— No se’ boni
     Mai dunque, mai, de far giustizia al mondo?

Sento, de fioi che strussia e rischia e tase,
     Azion stupende e sacrifizi sconti;
     A le do rive tuto ti ghe conti,
     O mar nostro, mar nostro senza pase.

Ghe dixe a le do rive el to furor
     Tanti eroismi che no ga servìo,
     Pati che xe sconzuri avanti a Dio,
     Lagrime amare che ne pianze in cuor.