M'ò sbaglià
|
Edission original: |
Umberto Foà, Nuove rime veneziane di guerra e di pace, Firenze, Libreria Internazionale, 1917 |
|
Fonte: |
| ← Le tose al balcon | Edission e fonte ▼ | El veglion → |
Gran desgrazia avèr el sangue
che ve bogie in te le vene,
fortunà xe quel che langue
4senza zogie e senza pene.
Ve go vista, v'ò amirà,
v'ò sentìa parlàr pulìto,
m'avè mezo strolegà:
8tante robe ve go dito!
E in t'un lampo me so iluso
(sempre un fià resto un putèlo)
che podèr filàrghe suso...
12gh'era tante stele in çielo!
M'ò sbaglià. So sta un bislàco
senza grazia e senza gusto:
podè darme del macàco,
16del vilàn, tuto xe giusto.
Sì, ma dèghe anca la colpa
ai vostri oci tanto bei.
Savè quel che me discolpa?
20Quei magnifici cavèi!
E se in fondo v'è restada
l'impression che so un vilàn,
ricordève de l'ociada
24che avè dà su la mia man.
Su la man ghe gera scrito
che son mato, ma son bon;
ben, fè conto de aver dito:
28l'è un vilàn, ma de passion!