Luna inlunada
|
Edission original: |
Vittorio Vitturi, Strade e vicoli, Rime veronesi, Verona, Fratelli Drucker editori, 1907 |
|
Fonte: |
| ← I vestiti de le done | Edission e fonte ▼ | Le scuse del mondo → |
I è tanti e tanti secoli
Che giro intorno al mondo,
Ma el digo ciaro e tondo
Mi de son stomegà.1
Me sento fin la fèvara,2
Quando riva la sera
E penso a quei zo in tera
Quante che i ghe ne fa...
I è ’na massa de ipocriti:
De giorno i par marmote;
Ma a vèdarli de note
Come me toca a mi!...
I buta via la màscara,
E, orori, digo, orori,
Fin che i è stufi lori...
Boca mia, tasi zo!
Gh'è si de i galantòmeni,
Gh’è de la gente onesta:
No mancaria anca questa,
Che no ghe n’ fusse più!
Mi po’ come satelite
Unico de la tera,
Pretendaria — elo vera? —
De farme rispetar!
Voi essar ragionevole:
A i pôeti no bado
Parchè me sta insegnado
Che ghe bala el granar.3
Ma esser fata ridicola
Da çerti sapientoni
Che spua de i paragoni,
No, proprio no, e no!
I dise a un poro stupido:
No 'l ghe ne imbròca4 una;
Dal mondo de la luna
El par che el sia vegnù.
I conta de le fròtole
E gh’è ci beve grosso?
La luna în fondo al posso
Eco che i g’à mostrà.
Uno l’è grasso e lustro
Con do ganasse5 da osto?
Oh, che luna d’Agosto
I è pronti a dirghe su.
Lassélo,6 lè un lunatico
I dise a un poro can,
Se un poco l'è a la man
E un poco l’è rabià.
Se gh’è un vecio che brontola
O un fiol che pianse in cuna,
Se sente: El g’ò la luna,
Ben, la ghe passarà!
Son l’astro malinconico,
Il faro degli amanti...
Sì, un bel mestier co i guanti
Che me fa proprio onor!
Oh, questa la me sbrùsega!7
E po’ farme l’insegna
— E i vol che me ne tegna! —
Del regno del Sultan!
Ma se no i vol desmétarla,
Quando g’ò pien el gosso
Me inalso fin che posso,
E no i me vede più!
- Note