Lettera a un Fisonomista
|
1826
|
|
Edission original: |
Luigi Martignon, Raccolta poesie veneziane dell'autore dei Capricci poetici nello stesso dialetto stampati nel 1819, Parte seconda, Treviso, Francesco Andreola tipografo, 1826 |
|
Fonte: |
Indice:Raccolta poesie veneziane dell'autore dei Capricci poetici nello stesso dialetto 2.djvu |
| ← Tutti ga i so gusti, e mi go i mii | Edission e fonte ▼ | Cerere, Giove, e Mercurio → |
Stupì che avè rason se ancuo ve scrivo,
Dopo un silenzio che ha lassà in dubbiezza
Se morto fosse, o vivo,
E pien come che se de gentilezza,
Sofrindo una secada,
Valevene de mi co egual franchezza,
Vu che ve se formada
Delle fisonomie la cognizion,
E che Lawater v'ha insegnà la strada,
Per giudicar del tristo, e del più bon,
De chi fa cerimonie, o xe sincero,
Feme ve prego sto servizio vero.
Vedarè el conte, el conte me capì,
Quello che dorme in libraria ogni dì,
Feghe i mii complimenti,
Disè che v'ho avvisà come a momenti,
Drio el replicato invito,
De lu fatome in vose, e molto in scrito,
Son disposto vegnir (sbarela grossa)
Per star con lu quindese dì se possa.....
Fatto che abbiè l'avviso,
Fisselo molto in viso,
E Se nol ve palesa un'espansion,
Formè pronta per mi l'annotazion.
Se godaremo co quel caro mato,
Vu seguiteghe a dir:
Dei versi che l'ha fatto,
Col vol farne lettura, oh ghe scometo,
Che sicuro lu resta anca un mesetto.
A sto colpo secondo
Da professor profondo,
Se lu cambia discorso, el segno è dà,
Che lu ga caro, che mi staga quà.
Godemo sto quadretto,
Amigo benedetto,
In ogni risultato,
Guadagno avaro fatto,
E se mentìo l'invido conoscemo,
Filosoficamente ridaremo.