Leggende fantastiche popolari veneziane/III

Da Wikisource
Jump to navigation Jump to search

EPUB silk icon.svg EPUB  Mobi icon.svg MOBI  Pdf by mimooh.svg PDF  Farm-Fresh file extension rtf.png RTF  Text-txt.svg TXT
100 percent.svg
Qualità del testo: sto testo el xe stà trascrito e rileto.
III. De dô compari de San Zuane che i gà giurà in nome de San Zuane.
1875
←  II Edission e fonte ▼ IV  →

[p. 10 modifica]III. — De dô compari de San Zuane che i gà giurà in nome de San Zuane.


No xè tanti ani che quà in Venezia ghe giera dô compari de San Zuane, e sti compari giera un toco de tempo che no i se vedeva. Un giorno, fra i altri, i s’incontra tuti dô, e uno de lori el dise: — «Oh, San Zuane benedeto! Quanto tempo che xè, che no se vedemo!» — L’altro ghe fa anca lu un pochi de complimenti, e pò i dise: zà che s’avemo catà, andemo a marenda assieme. Là i va a marenda assieme, e, co’ i gà finìo da marendar, se alza suzo uno de sti compari, e ’l va a pagar el conto senza che st’altro se n’incorza. St’altro, dopo, el dise: — «Ciamemo e paghemo, che pò anderemo via assieme.» — Dise el primo: — «Quà no ghe xè gnente da pagar, che xè tuto pagà.» — Alora ghe dise st’altro: — «Zà che ti gà volesto pagar tuto ti, ancuo oto tocarà a mi.» — E i ciapa su, e i va via. Co’ i xè per lassarse, i se ritrova su ’na cale che fasseva crosera, e là i se ferma e i discore, e pò, el compare che no gaveva pagà, dise a l’altro: — «Dunque, a rivedarsi ancuo oto quà su sta crosera, a l’ora istessa.» — «Sì.» — «Parola de San Zuane de no mancar.» [p. 11 modifica]— «Te giuro per quel San Zuane che gavemo fato, che sarò quà su sta crosera a spetarte.» — E là i se dà la man; e pò, uno va zò per una parte, e l’altro va zò per ’n’altra.

Perdiana, che in sti oto giorni ghe ciapa mal al compare che gaveva pagà, e el mor.

St’altro no saveva gnente ch’el fusse morto, e a quel ora che i giera intesi de aspetarse, el va su la crosera a spetarlo. Intanto passa un so amigo, e ’l ghe dise: — «Cossa fastu quà?» — St’altro ghe risponde: — «Speto mio compare Toni.» — «Compare Toni ti speti, che xè tre zorni ch’el xè morto? Ti gà un bel spetar!» — «Ti ti disi ch’el xè morto? Vàrdilo quà ch’el vien!» — E infati elo lo vedeva, ma st’altro no, nol lo vedeva. El morto se ferma avanti sto so compare, e el ghe dise: — «Ti gà razon che ti xè quà su sta crosera, e ti pol ringraziar Dio, chè del restante te farìa mi imparar a far giuramenti in nome de San Zuane.» — E subito el sparisse, e st’altro compare no lo gà più visto, parchè el giuramento che i gaveva fato no ’l giera altro che de trovarse in quel logo.

Traesto fora da Wikipèdia - L'ençiclopedia łìbara e cołaboradiva in łéngua Vèneta "https://vec.wikisource.org/w/index.php?title=Leggende_fantastiche_popolari_veneziane/III&oldid=51810"