Le tredese Cassarole al ponte dei Dai
|
Edission original: |
Giovanni Mazier, Passatempi de Tasi Nane, Venezia, Fratelli Visentini, 1894 |
|
Fonte: |
Indice:Mazier - Passatempi de Tasi Nane, Venezia, Visentini, 1894.pdf |
| ← Un duelo fra do avocati | Edission e fonte ▼ | El bastardo nobilomo mediator de lofi → |
La xe ora che le tredese
Rinomade cazarole
Ghe sia chi che se ne ocupa
E che diga do parole.
Anca quelo si credemelo
De sto secolo assae uman
Xe dasseno un'amirabile
Monumento Vespasian
Se gustava imensamente
Nel passà far 'na cagada
De Venezia da la zente.
Proprio in acqua e no per strada
Tanto è vero che co' spirito,
Chi sti afari ga per man,
I ga dito per motegio
Caga in acqua a un Venezian.
Ma da quando che le tredese
Cazarole se ga messo
E pensà ga el Municipio
De no dar più el permesso,
Che nè in strada e gnanca in acqua
I bisogni s'abia a far
Se ga visto ogni contrada
Pissadori deventar.
Qua un sistema semplicissimo
Più in là un altro complicato
Uno in vista, l'altro sconto
De no vedar co' s'à fato.
Anzi credo fermamente
Che un aposito inzegner
Per sta specie d'edifici
Gabia aver sto sol pensier.
Necessaria xe la pratica
Ma i moderni sapientoni
I ga dito che gramatica
Ghe ne vol fin pei cantoni.
Che se no sì un Lazareto
Se riduse sta cità
Se uno sfogo tanto el liquido.
Quanto el solido no ga.
Li go in cesto mi sti tecnici
Ste persone de talento
Ma credè dal lato igienico
I à pensà che xe un portento.
De impenir i conduttori
De le strade de malizia,
Che le case liberissime
Ghe impenisse de sporchizia.
Basta sol che i proprietari
I ghe paga la so tassa,
Che del resto i xe paroni
Soto strada far manbassa.
I ga fato a San Clemente
De sistema nove fogne
No so come no le copra
Dei inventori le vergogne.
Via pensè ch'el solo Beaufre
Bravo ometo de francese
L'à impiantà quel logo noto
Che ben serve sto paese.
E l'avudo la bravura
De afidarlo a certo Zorzi
Che ga proprio una gran cura
Che no passa gnanca i sorzi.
Onde tuto progredissa
In un modo confaciente
E che dir se possa sempre
Nol xe logo puzzolente:
Viva dunque sia le tredese
Cazarole preparae
Fate far dal nostro Beaufre
E da Zorzi coltivae.