Le squinzie
|
Edission original: |
Giglio Padovan, Rime in dialetto veneto di Polifemo Acca, Trieste, Appolonio & Caprin, 1875 |
|
Fonte: |
| ← El ciaciaron | Edission e fonte ▼ | La marantega → |
Tolè, pitor, la taolozza in man:
Tireme zo co quatro penelae
Sta manega de squinzie spetorae
Che sbazzega in teatro e fa bacan.
Nel so palcheto vedarè una siora
Dal naso a beco e dal barbuzzo in fora;
Tuta smorfie e morbin, tuta scoverta,
Più de la Pompadour e la Ninon
De l’alta scola nei secreti esperta.
Missiandose qua e là tuta la sera
Piena de grili come una puliera,2
No la se volta mai verso la scena
Che per mostrarghe al publico la schena.
Col tiro più academico e più scaltro
La ve sparisse da un momento a l’altro,
E la ve torna fora a poco a poco
Come la luna in tempo de siroco.
Ogni tanto la becola un confeto,
Ciacolando la papola el sorbeto;
Co la ganassa sgionfa, a do palmenti
I caramei la masena co i denti,
O la se mete in una posa tal
Da zurar che la magna el canocial.
La sa far i sberlefi co la boca,
Slongar el colo da parer un’oca;
Restarve là, incantada più d’un’ora
Col naso in aria e co la lengua fora;
Ma se i ghe mola un colpo al tamburon,
Povera tata, la se dà un scasson.
E vu altre petazze buscarone
Che studiè tanto sul color del fioco
Per far beato un povero marzoco;
Vu altre squinzie co l’anelo in deo,
Che zirè tuto ’l zorno avanti e indrio
Portando in un scartozzo
El vadagno d’un mese del mario,
Specieve in ste galine faraone!
- Note