El ciaciaron
|
Edission original: |
Giglio Padovan, Rime in dialetto veneto di Polifemo Acca, Trieste, Appolonio & Caprin, 1875 |
|
Fonte: |
| ← El curioso | Edission e fonte ▼ | Le squinzie → |
Suto, suto, col naso impeverà,
Co le do zampe in crose e col barbuzzo
Sul pomo de la crozzola pontà,
Ve presento quel strazza d’omenon
Che se magna in salata Ciceron;
Che, tabacando, spua sentenze d’oro:
Quelo che tagia la borela al toro,
Voleu saver per cossa
La cometa de Biela ga la coa?
Fra presa e presa el ve dirà la soa.
La grandezza el conosse d'ogni stela
Megio che i busi de la so scarsela,
El sa tratar politica e finanza
Più del pelao ch’à petenà la Franza,
E divider l’Europa malcontenta,
Come quel fil che tagia la polenta.
Sorzo de biblioteca e gran censor,
El ve giudica i libri da l’odor,
E par che l’abia col divin poeta
Quatro cibibi sgnocolà in bareta.1
Comentando i zornai riga per riga,
Più de la vespa el ponze e de l'ortiga;
E trovandoghe drento un macaron,
El ve lo porta fora col piron.
El ve sa tamisar Cristo e Mosè,
Pesar ne l'aqua la corona a i re.2
Ma cossa ancora a criticar ghe resta?
El perucon de stopa che 'l ga in testa?
Co parla sto bocon de dotorazzo
Tireve su la boca el caenazzo,
E prima che no l'abia terminà
Guai a chi olsa de tirar el fià!
Ma co 'l s’acorze che nissun lo bada,
Co le pive nel saco el volta strada;
E brontolando e destorzendo 'l colo,
Per no perderla marza el parla solo.
- Note