La sborgna diplomatica
|
Edission original: |
Giglio Padovan, Rime in dialetto veneto di Polifemo Acca, Trieste, Appolonio & Caprin, 1875 |
|
Fonte: |
| ← In morte d'una massera | Edission e fonte ▼ | La spisima → |
LA SBORGNA DIPLOMATICA
Ah che fragia, sior Luca! S'à balà
Fin dopo mezanote, e nel bufè,
Branca chi branca, tuti s’à sludrà1
Co bibite, pastizzi e fricassè.
Chi s'à macià le braghe e chi el gilè,
Piati e bicieri in tochi s’à mandà;
S'à rebaltà careghe e canapè,
E per tera più d’un s'à remenà.
Peraltro, col mio modo de pensar,
Go in odio sti bordei, ste confusion;
E, dove posso, me la so cavar:
Ma co certe zelenze, come fala?
Per conservar sto fià de posizion,
Cossa vorla? Anca mi ciapo la bala.
- Note
- ↑ Rimpinzati.