Pagina:Rime in dialetto veneto di Polifemo Acca.djvu/86

Da Wikisource
Sta pagina la xe stà trascrita, ma la gà ancora da vegner rileta.
LA SBORGNA DIPLOMATICA


     Ah che fragia, sior Luca! S'à balà
Fin dopo mezanote, e nel bufè,
Branca chi branca, tuti s’à sludrà1
Co bibite, pastizzi e fricassè.
     Chi s'à macià le braghe e chi el gilè,
Piati e bicieri in tochi s’à mandà;
S'à rebaltà careghe e canapè,
E per tera più d’un s'à remenà.
     Peraltro, col mio modo de pensar,
Go in odio sti bordei, ste confusion;
E, dove posso, me la so cavar:
     Ma co certe zelenze, come fala?
Per conservar sto fià de posizion,
Cossa vorla? Anca mi ciapo la bala.

  1. Rimpinzati.
Traesto fora da Wikipèdia - L'ençiclopedia łìbara e cołaboradiva in łéngua Vèneta "https://vec.wikisource.org/w/index.php?title=Pagina:Rime_in_dialetto_veneto_di_Polifemo_Acca.djvu/86&oldid=71258"