La pase universal
|
Edission original: | |
|
Fonte: |
Indice:Luigi Cappello - Dai rovinassi del campanil, 1905.pdf |
| ← Franza e Vatican | Edission e fonte ▼ | A una Letterata → |
L'idea xe bela, e uman xe 'l gran sentir
de chi vorave tuto 'l mondo in pase;
de chi più non voria sentir sofrir
da chi, sofrindo, me sospira e tase.
Oh cari cuori, vualtri che ve piase
ai simili pensar, e benedir
ve possa, da le povare so case,
mame e papà da adesso e in avenir!
Mi xe da tanto che ghe stago adrio,
al agitarse de sta brava zente;
ma se me volto un pochetin indrio,
vedo che al mondo ghe xe più de un sordo,
e che anca su question de poco o gnente,
gnanca su quele no se va d'acordo.
Se fa ogni tanto qualche bel congresso
che termina in magnifico disnar,
se parla e se descute del progresso
che vol la pele umana risparmiar;
tuti dise la soa, xe in tuti istesso
el pensier che l'à fati radunar;
se bandisse concorsi e xe parmesso,
a chi ga fede, de poder sperar.
Ma intanto che se parla e se descore
co tuta la più gran comodità;
e mentre passa i ani, i mesi e le ore
in ste academie a pro d'umanità,
la zo in Oriente, dove nasse el Sol,
i se sbuela tuti più che i pol.