La moda
|
Edission original: |
Raccolta di poesie in dialetto veneziano d'ogni secolo nuovamente ordinata ed accresciuta, Volume unico, a cura de Bartolommeo Gamba, Venezia, G. Cecchini, 1845 |
|
Fonte: |
| Edission e fonte ▼ |
SOGNO.
Sta matina bonoreta,
Tolta suso la pineta,
So arivà... cussì... bel belo
Qua in tel bosco del Montelo.
5Russignoi? no i xe gnancora
Capitai: che no xe l'ora;
Ma se sente non ostante
In maniere tante, e tante
Varie sorte d'oseleti
10Solfegiar dei bei trileti.
Le parussole, i cainegri
Sempre in festa, sempre alegri;
Qualche merlo inamorà
Da la sposa sbandonà;
15Finchi, tordi, roveghini,
Petirossi, gardelini,
Va d'acordo tuti quanti,
Chi coi subi, chi coi canti,
In onor de la boschiva
20Libertà facendo eviva.
I pensieri poco lieti,
Che a le volte anca ai poeti,
Come al resto dei mortali,
Porta in cuor tristezze e mali,
25M'a lassà per un pocheto
Ste delizie a goder quieto,
Favorio da la stagion
Soto l'ombra d'un machion.
Qua la mata fantasia,
30Che ghe piase saltar via,
Come i osei de palo in frasca
Mile idee la me tambasca.
Quando ariva in quel mumento,
Portà là forsi dal vento,
35O invidà da la verdura,
El nemigo d'ogni cura:
El me passa proprio a lai,
Senza tachi sui stivai.
L'alza su la bachetina...
40El me dà una tocadina...
Casco zo... fazzo un soneto
Co la zonta d'un sogneto.
Eco el sogno: in alto mar
Me pareva navegar
45In t'un picolo batelo...
Gera el dì tranquilo, e belo;
E una fresca bavesela,
Che supiava in te la vela,
M'a butà... dove? no so;
50Ma in sto mondo certo no.
Me son visto in t'una rada
Da montagne circondada.
Buto l'ochio su la riva:
No ghe gera anima viva.
55No so cossa abia da far;
Pur me rischio de smontar.
Vardo in alto, vardo abasso:
No gh'è crode, no gh'è un sasso,
No gh'è un alboro, un cason,
60No gh'è tera, nè sabion.
Tuto el lio xe tapezzà
De scarlato, de brocà
Pani, tele, sede, rasi,
Scorze d'albori, bombasi,
65Stofe, merli, galaneti,
Trine, scufie, conciereti...
Figureve co incantà
Che a sta vista so restà.
Vado avanti un pochetin
70Verso el monte più vicin...
Altro aspeto, ma in complesso
El me par luto l'istesso;
Gera el monte una catasta
De strighessi d'ogni pasta:
75Vere, aneli, brazzaleti,
Cadenele, relogieti,
Aghi, stuchi, perle, zogie:
Qua in colane, là in rechini,
Qua in diademi, là in manini,
80E per darghe magior lume
Sventolava un mier de piume
Su dei bossoli impiantae,
Che pareva de pomae,
Profumae de tuti i odori,
85D'ogni sorte de colori.
Sbalordio, senza pensarme
Che nissun staga a vardarme,
Per un moto de stupor,
Che no so tegnir in cuor,
90Cigo alora; pofarsbrio!
Chi ga fato mai sto lio?
Chi sii monti à fabricà?
Chi sa dirme chi ghe stà?...
Dito apena da un valon
95Spenta su una prussission...
Scampar via?... no gh'è più caso:
Stago atento, vardo, e taso.
Precedeva picoleti
Una lista de genieti,
100Che no so se i caminasse,
O su l'ale i se girasse.
Parte in testa, parte in man,
Chi una scufia, chi un galan,
Chi una ventola, o un'ombrela,
105O qualche altra bagatela,
Tuti quanti el so fardelo,
Poco o tropo, avea con elo.
Vegnia drio una quantità
De persone d'ogni età,
110D'ogni sesso, e condizion,
E de tute le nazion.
Là Persiani; là Chinesi,
Là Spagnoli, là Francesi,
Piemontesi, Veneziani,
115Russi, Turchi, Americani...
In t'un atimo la rada
Un marcà l'è deventada.
Gnente ancora... drio de lori
Segue l'arti: qua sartori,
120Sartorele, chincaglieri,
Colarine, peruchieri,
Zogelieri, petenete,
Calegheri, ventolete;
E cent'altri, che podè
125Figurarve, se volè.
Co à finio sta comitiva
Eco zonzer su la riva,
Tra un eviva general
Un gran caro trionfal.
130Una dona de figura
Gigantesca... guardadura
Civetina .... ma che avea
Le sembianze de una dea
Stava in cima. Le so veste
135Gera semplici, modeste;
I ornamenti gera strani,
Ma no i gera sovrumani:
Bensì tuto cussì fato,
Che cambiava trato trato
140Stampo, tinta, qualità,
Senza moverse de là...
Come?... chi lo pol saver?
Come el lampo del pensier.
Dava logo el capelin
145A un elmeto svoltolin,
I caveli inanelai
Ai racolti ingirlandai;
Ora un abito perfeto,
Ora cotola, e corpeto,
150Presto strascino; po no;
Po pelizza, o dominò...
Curte... in soma variazion
Da far mato Ciceron.
La se ferma... l'alza i ochi...
155(Mi me tremola i zenochi)
Tuti tase... «I vostri voti,
Fidi popoli devoti,
Mi compiaccio d'esaudir.
Ecco qui quanto il desir
160Suggerire a voi potea
(Za capì, parla la dea)
Qui raccolto lo vedete.
Soddisfatevi, prendete
Tutto quello, che vi aggrada...»
165Stago a veder che spianada!
Quela zente come 'l vento
Se disperde in t'un mumento.
Chi tol questo, chi tol quelo,
Tuti cerca el megio, el belo;
170Ma (prodigio!) quel che i cata
Nele man se ghe barata:
Buta zo... tol su da novo...
Gnente.. istesso... semo ab ovo.
Tum... me svegio... coss'è stà?
175Cazzadori che à sbarà.
Torno a casa: caminando
Vado el sogno via studiando...
I galanti che i se goda!
So sta al regno de la moda.