El maldicente
|
Edission original: |
Camillo Nalin, Novelle in dialetto veneziano, Venezia, Tipografia Andreola, 1819 |
|
Fonte: |
| ← La falsa aparenza | Edission e fonte ▼ | La burla → |
Un omo de calibro
Dei secoli passai,
De quei che atorno un libro
4I xè insatanassai,
Campava i dì felici
Contento del so stato
Avendo per amici
8Un Prete, e un Avocato
E lu li socoreva
Cussì de quando in quando,
Perchè no i possedeva
12Tre lire al so comando;
El primo un religioso
Pien de talento, e bon;
Quel altro un invidioso,
16Un furbo, un cabalon.
Diatribe sto secondo
Ghe fava a tuti quanti,
El batizava al mondo
20Chi sciochi, e chi birbanti:
El va a trovar un zorno
Quel omo leterato,
E po da vero storno
24Ghe dise tuto a un trato. —
I amici, che se conta
Più de bon cuor, più cari
I tien la forfe sconta
28E i tagia zo i tabari;
Quel degno sacerdote,
Che tanto vu stimè,
El mormora dì e note,
32El dise che vu sè
Un omo senza sesto
Che afani no se tol,
Che forsi sarè onesto,
36(Ch'entrar quà lu no vol;)
Che vu dè bezzi a usura,
Che rovinè la zente,
E per leteratura
40Che nol ve stima gnente;
E cento mile cosse,
Che par che gabiè fato
Con chi no ve conosse
44Azion da scelerato. —
L'omo che gà talento
Le idee no se confonde,
Ghe pensa su un mumento
48E dopo el ghe risponde. —
Capace, lo confesso,
No credo sia quel tal;
O nol s'à ben espresso,
52O che avè inteso mal:
Lu me conosce a fondo,
El sa i mii sentimenti,
E che no fazzo al mondo
56Sto sfarzo de talenti.
Che odio, e che detesto
Quei tali che fa stochi,
Perchè i vien richi presto
60A spale dei pitochi; —
Ma insiste l'Avocato
A dir che l'à sentìo,
Infin che 'l Leterato
64El bergamo à capio;
El gà capio, bravissimo,
Che no xè vero gnente,
Che tuto xè falsissimo,
68Che 'l prete xè inocente,
E ghe sogiunge lesto
Senza cambiar mai ton; —
Se dunque el dise questo
72Vol dir che 'l gà rason,
Che i mii difeti è certi,
Che me li porto adosso,
Che lu me l'à scoverti,
76Che mi no li conosso,
E po perchè me regola
Da furbo el ghe li conta
A un omo che petegola
80Metendoghe la zonta. —
Asvelto più d'un gato,
Come l'avesse l'ale,
Confuso l'Avocato
84L'è andà zo per le scale;
E dopo de sta racola
Lu no gà avudo muso
Co tuta la so ciacola
88De andarghe più dessuso.
Da sto curioso anedota
Se pol capir che spesso
Chi cerca el mal del prossimo
92Pregiudica se stesso.