La cuna

by Berto Barbarani

3 La cuna I due canzonieri I due canzonieri/Libro VI - Le tre cune L'ultima barufa I due canzonieri/Libro VII Berto Barbarani 1911 XX Soneti veronese

Indice:Berto Barbarani, I due canzonieri, 1917.pdf

Berto Barbarani ―  I due canzonieri  ― Libro VI - Le tre cune

La cuna

1911

Edission original:	Berto Barbarani, I due canzonieri, Verona, P. Apollonio, 1917
Fonte:	Indice:Berto Barbarani, I due canzonieri, 1917.pdf

←  L'ultima barufa

Edission e fonte ▼

Libro VII  →

LA CUNA.

Un late che spiuma
'na tenda de franse,¹
un tato² che ruma,³
'na vosse che pianse...

Al ciaro de luna
ho visto 'na cuna.

La camara granda
fodrada de speci,
el par che la spanda
el gusto dei veci,

che vede el neodo
stampado a so modo.

La porta se gira,
vien 'vanti un passeto,
el tato se tira
la man sul museto,

la mama lo basa
che trema la casa.

Bocheta de dama,
bocheta de fraga:
mi son la to mama
mi son la to maga...

La luna camina
de drio⁴ la tendina.

Che vuto⁵ tesoro
par far che te tasi?
Te cargo⁶ de oro,
te cuerso⁷ de basi...

La luna se ostina
de drio la tendina...

El tato fa segno
de ridar, pò, el tase...
A lu, no ghe piase
che i tati de legno,

ma tanti e col s-ciopo
che diga: Te copo!⁸

Ghe basta 'na s-cianta⁹
de late, la teta,¹⁰
la roba più santa
più dolçe, più s-cieta;¹¹

ma lu no pol dirlo...
Bisogna capirlo...

La mama se mola
un poco el corpeto,
la boca se incòla,¹²
el tato l'è chieto...

La luna se inchina
de drio la tendina!

---

Note

1. franse: frangie
2. tato: bambino
3. che ruma: che frugna.
4. de drio: di dietro
5. che vuto: che vuoi
6. te cargo: ti carico
7. te cuerso: ti copro
8. te copo: ti ammazzo.
9. s-cianta: un poco
10. teta: mammella
11. s-cieta: schietta
12. se incòla: si attacca.