La cresema
|
Edission original: |
Camillo Nalin, Pronostici e versi di Camillo Nalin, Volume III, Venezia, Giambattista Andreola, 1858 |
|
Fonte: |
| ← El chierico stolido | Edission e fonte ▼ | El zarlatan → |
Sior Checo Nasavento,
Mercante da formento,
Bravissima persona
Co qualche ruspio in cassa,
5El veste a la carlona
Un poco massa,
E in barba a la decenza
El porta in conseguenza
Una velada
10Sina che l'è fruada,
Onta e bisonta,
Dopara un veladon
Gol so bravo tacon,
Co la so zonta,
15Avendo blus, paltò,
I sachi, le marcine,
Indove le galine
Fa el cocò;
Infati uno de quei che certa zente
20Filosofi ghe dise impropriamente.
Ai vinti de genaro
Tranquilo Nasavento andava via
Zirando in marceria
Con un tabaro
25Del tagio che se usava
Ai tempi fortunai
De Marco Caco,
Che ghe arivava
Al taco
30Dei stivai,
Facendoghe paura
Ai tabari de moda povareti,
Che ze in abreviatura,
E par rocheti.
35Un de sti zizoloti
Impertinenti, arditi,
Figure da sberloti,
Dei quali in tuti i siti
El numero ze grando,
40E fatalmente
I se va propagando
Imensamente,
Credendo sto somaro
L'amigo dal tabaro
45Un mamara, un tandan,
Che no sapia dir pan,
Se ghe caluma al fianco,
Ghe squadra la persona,
E po ghe dise franco:
50— La perdona,
Caro sior Nasavento,
La mia curiosità,
Vala, opur zela stà,
A tegnir a batizzo in sto mumento? —
55No, el ghe risponde — cresemo — ma intanto
Che 'l proferisce suta sta parola
Un sberloto ghe mola
Da ogio santo,
Che lo destira in strada,
60E po tranquilo e quieto
Se dà un'intabarada,
E tira dreto.
Sta lizion gratuita
Ghe ze andada de vita
65Estremamente
A qualchedun che s'à trovà presente,
Ma sora tuto a chi del zizoloto
El caratere tristo gera noto.
Adesso che parlemo
70I Nasavento
Faria bisogno estremo
Ogni mumento.