La burla
|
Edission original: |
Camillo Nalin, Novelle in dialetto veneziano, Venezia, Tipografia Andreola, 1819 |
|
Fonte: |
| ← El maldicente | Edission e fonte ▼ | Mario Malani → |
L'altro zorno diese dodese
Zovenoti galantoni,
Morbinosi quanto Eraclito,
4Ma de fondo tuti boni,
Che pronunzia el so giudizio
Sora questo, e sora quelo,
E che in testa gà el catalogo
8De le done da cartelo,
I se porta more solito
De conserva per chiassar
In t'un logo in ora topica
12L'apetito a sodisfar;
Tuta zente che xè comoda,
Che ghe piase l'alegria,
Che pol spender el so talaro
16Per disnar a l'ostaria,
Ganimedi galantissimi
De quei proprio del bon ton,
Cortesani che la mastegha,
20Che camina col baston;
Un de lori pien de spirito
Quando ariva in tola i fruti
Sie zechini espone al publico;
24Ghe vien l'acqua in boca a tuti:
Che in sti tempi climaterici
Sie bei ruspj de paela,
Mi lo so, ma no per pratica,
28I stà ben drento in scarsela;
E po dopo a tuto el circolo
El ghe dise: — saver voi
Cossa ognuno pagaria
32Se sti bezi fusse soi? —
Tuti alora fati prodighi
A sta tal proposizion,
I propone cafè, punchi,
36El rosolio, el zavagion.
Fra sti tali sior Parsemolo
Omo asvelto che ragiona,
El capiva che ghe'l bergamo,
40Che qualcuno se cogiona,
E a cercà tuto el pussibile
Per no dir cossa el faria,
Ma no l'a podesto esimerse,
44Dal servir la compagnia;
E anca elo regolandose
Sora quel che l'à sentio,
El gà dito per compiaserli: —
48Se quel oro fusse mio,
Se disponer a capricio
Mi podesse quei contanti,
El cafè col so rosolio
52Pagarave a tuti quanti. —
Ben: la toga: — dise subito
Quel che fava sta filada, —
Questo qua xè un zechin ruspio,
56Sia la cossa terminada,
E za che quà de bon'animo
Semo tuti, e spezialmente;
Ela caro sior Parsemolo,
60La lo spenda alegramente;
La lo spenda, e tripudiemolo
Sina mai che ghe ne xè,
La ne fazza far el brombolo
64De rosolio e de cafè. —
A veder sto cuor da Cesare,
Sto tratar co nobiltà
Che xè adesso andà in desmentega,
68Nè più in uso tornarà,
Se stupisce in grado massimo,
Nè faceva altro che dir:
O l'è mato da San Servolo,
72O per baco el vol morir;
Ma l'à subito dà i ordini
Da preciso cortesan,
Custodindo zelantissimo
76La moneda in te le man.
Comparisce là in t'un atomo
Ben fornido un cabarè,
Dove i beve fati emuli
80Sinamente che ghe n'è:
I chiassava, i fava strepito
Tuti pieni de morbin,
Co l'idea che se tripudia
84Sotto l'ombra del zechin,
Anca el nostro sior Parsemolo
Gera ilare e contento,
Tuto altro imaginandose
88Che ghe fusse el tradimento,
E facendo da lustrissimo
Come gera el so dover
Fin a l'ultimo centesimo
92Paga el conto al cafetier.
A sto passo quel che i ruspj
Destirai gaveva in tola,
El gà dito con de l'enfasi: —
96Mi domando la parola: —
E se mete in ton da catedra
Con un'aria da dotor,
Dirigendo a Sior Parsemolo
100El discorso in sto tenor. —
Ela à dito, no gh'è dubio,
Se mii fusse quei contanti
El cafè col so rosolio
104Pagarave a tuti quanti;
Ben; la sapia, che mi venare
Gera a Padoa capità,
Quando incontro soto i porteghi
108Verso el Santo el so Papà:
El me ferma gentilissimo,
Me domanda — come steu?
Ben ghe digo, e lu me replica,
112Da ste bande indove andeu?
Ghe rispondo che a Venezia
Go intenzion de andar sta sera,
E che anzi per dirigerme
116Gera alora a la coriera:
A pregarve de un incomodo,
El me dise, mi saria;
Mi ghe salto suso subito,
120Comandè gesusmaria!
Nele man me dà una letara
Che conservo quà in scarsela
Sul mumento consegnandome
124Sie zechini de paela,
E me incarica de dargheli
Co la letara a so Fio,
E po dopo saludandome
128Me dà un baso, e va con Dio.
Col sigilo ancora vergine
Go la carta conservà,
E i so soldi propri identici
132A Venezia go portà:
Questa qua xè la so letara,
Cinque ruspj questi i xè,
E mi resto ringraziandola
136Del rosolio e del cafè. —
De sta burla sganassandose
Tuti chiassa, e fa sussuro,
Ma per altro sior Parsemolo
140Stava là col muso duro;
El silenzio el cambia in colera,
E se mete a far barufa,
Sostentando in virga ferea
144Che cussì la xè una trufa;
El ghe dise strapazzandolo: —
Sto contegio no va ben,
E pretendo in punto e virgola
148Tuti i soldi che me vien,
Altrimenti co una suplica
Mi ricoro ai tribunali,
Nominando testimonj
152De la trufa i comensali. —
La facenda cussì termina,
Tuti ride come mati,
Ma lu intanto inesorabile
156El xè drio che'l ghe fa i ati.
Per el caso che ò contà
Quel proverbio rancidissimo
160Tanto in uso e remenà:
A l'ostaria no vago,
162Ma co ghe son ghe stago.