Mario Malani
|
Edission original: |
Camillo Nalin, Novelle in dialetto veneziano, Venezia, Tipografia Andreola, 1819 |
|
Fonte: |
| ← La burla | Edission e fonte ▼ | El morto vivo → |
El Conte Caparo
Voleva tor
Bon, bravo e zovene
4Un servitor;
L'era dificile
Da contentar
Tuti sti meriti
8Per combinar.
Tanti tantissimi
Se ghe presenta
Ma no ghè un'anema
12Che lo contenta,
Chi gera vechio
Quasi impotente,
Chi tropo zovene
16Chi bon da gnente,
Uno assae picolo
Xè de statura,
St'altro una latola
20Senza figura;
Alfin ghe capita
Un che pareva
Con tuti i numeri
24Che lu voleva.
Lo ferma subito
Sperando za
Quel che ghe comoda
28De aver trovà.
Muto el lo esamina
Da capo a fondo
Come un prodigio
32Del novo mondo,
E po lo interoga
Col dir: Chi seu?
Maridà, o nubile
36Che età gaveu?
Mi son, lustrissimo,
Mario Malani
Son omo scapolo
40Go vintiot'ani.
Bravo, bravissimo,
Va ben fin quà;
Ma come stemio
44De abilità?
Son bon da spender
Da cusinar
So bon le camare
48Da destrigar.
Son bon da petene
Bon da incolar
Me inzegno a cuser
52A sopresar.
Son de quei omeni
A tuto usai,
Sina la patina
56Dago ai stivai.
Bravo bravissimo
So contenton;
Ma come stemio
60De informazion?
Benchè i miei meriti
Sia assae ristreti,
Queste pol darghele
64Varj Sogeti:
Dal Conte Datolo
So sta do mesi
E ò dovù perderlo
68Per mali intesi,
Tratà da smafaro,
Ma za inocente,
Pol asserirghelo
72Tuta la zente,
Per una suplica
De quel cagnera
Son andà risego
76De la galera.
Dal Conte Otavio
Luculo Basa
Mi gera economo
80Mistro de casa;
La povar'anima
Da chi no i sa
L'è resta vitima
84Avelenà;
E la superstite
Berta so fia
Per fin politico
88M'à mandà via:
Pianzendo a lagreme
El mio Paron
M'ò messo a vender
92Corda e saon.
Ma el mio negozio
Voler de Dio
Xè andà malissimo
96E go falio,
Falio intendemose
Coi bezzi in man;
Come xe'l solito
100Da cortesan.
Per po' rimeterme
Onestamente,
E far che giubila
104De più la zente,
Unito a Rusola
Sanser da stochi
Omo bravissimo
108Da pescar gnochi,
Quei quatro talari
Li gò impiegai
E al cento e quindese
112L'ò radopiai.
Ma à fato el Diavolo
Per mia malora,
Par impussibile!
116Che me inamora,
Lusverde Trapola
Gran balarina
M'à co un balabile
120Butà in rovina.
Drio quela femena
Me sò inzucà,
E co' un centesimo
124No m'è restà,
Tol su e va a Napoli
Siora Lusverde,
E mi adorandola
128So restà al verde.
Cargo de debiti
E in tristo arnese
So andà al servizio
132D'una francese.
Doneta zovene
De bon sestin,
Piena de spirito
136E de morbin;
Dove'l ricapito
Gera de tanti
Che in piazza i nomina
140Come galanti.
Bench'el salario
Che la me dava
Fosse assae picolo,
144Me la passava;
Perchè le visite
Che là vegniva,
E che spessissimo
148Za favoriva,
Le gera prodighe
Senza confin;
Chi dava el talaro
152Chi el so zechin
Ma i beni termina
Co se contento,
E'l mal ve capita
156In t' un mumento.
Vien fora l'ordine
Che tempo un mese
Vada sta femena
160Al so paese;
El zorno capita
De far partenza,
E mi la seguito
164Sina a Vicenza;
Là inamorandose
De sta creatura,
Un omo vedovo
168El la rancura;
Profita subito
La mia Parona
Del bon caratere
172De la persona,
E licenziandome
Senza pietà
Quela ingratissima
176M'à abandonà.
Là senza apogio
De sorte alcuna
Doveva bater
180Sempre la luna.
Ma mi per indole
Piutosto forte,
Fando el filosofo
184Sora la morte,
Disea, se seguito
A star a spasso,
Adio bucolica,
188Vago a patrasso.
El mio peculio
Gera ridoto
Gnanca un centesimo
192Più de un daoto;
Ma inzegnosissimo
Quando ocoreva,
Gera pien d'anima
196Nè me perdeva,
Anzi per dirghela
Me la campava
Benchè un centesimo
200No guadagnava.
Quando me capita
Da aprofitar
Senza pericolo
204De un bon afar,
Che esaminandolo
Lo go abrazà,
E al ciel piacendoghe
208M'ò repetà.
Da là pochissimo
A dir se sente,
Ch'el Conte Agapito
212Baron del Dente,
Facendo i calcoli
Nel so mezà,
Se acorse subito
216Che i gà robà
Un mier de bavare
Co gran bravura,
E senza romperghe
220La seraura.
Davanti i giudici
Ricorso el fa
Aciò el colpevole
224Vegna trovà.
La cossa i esamina,
E in conclusion
Tolto in equivoco
228So andà in preson,
E (el più teribile
Corpo de Diana!)
Senza demeriti
232Go la condana
De star in carcere
Quatr'ani intieri,
E la se imagina
236Quanti pensieri!
Dopo sto recipe
So vegnù fora,
Nè ò trovà un'anema
240Che me rincora;
Quando dal celebre
Dotor Bruscheti,
Famoso medico
244Destriga leti,
Che smaniosissimo
Cercava un cogo
Che fusse abile,
248Per dia me logo;
Ma sto lustrissimo
Che mi serviva,
Altro che i liquidi
252Nol digeriva,
E per pramatica
Gavea da entrar
I vovi tenari
256Nel so disnar.
Sempre bersaglio
De la fortuna,
Che me perseguita
260Sin da la cuna,
E poco pratico
La se figuri,
I vovi in tavola
264Ghe andava duri.
Per quanto studio
Che gabia messo
I vovi caspita
268Gera l'istesso,
Finchè stufandose
El mio paron,
E anca credendola
272Ustinazion,
Abonorissima
Una matina
El vien in colera
276Drento in cusina,
E in modi barbari
Con vilanie
El me licenzia
280Là su do pie.
Eco che dunque
Co sta filada
Povaro Mario
284Xè su la strada;
E no ghè dubio,
Se me aviliva
Da la miseria
288Certo moriva.
Go cercà subito
Qualche ripiego,
E per miracolo
292Go avù un impiego;
Impiego misero
Che me destina
Su la flotiglia
296Quà a la marina,
Finchè stufandome
De quel mistier
So passà zovene
300Da un peruchier;
Omo austerissimo,
Ma bravo assae,
Che fava i bucoli
304Per ste casae,
Un dì el me ordina
De farghe un zufo
E una gran sassara
308Per Casa Sbrufo?
M'ò messo a l'opera,
Con atenzion,
Ma de riescerghe
312No so sta bon,
E inacorsendose
El principal
Che son un aseno,
316Che ò fato mal,
Pien de irascibile
El me strapazza,
Quasi un canonico
320Fusse de piazza.
Senza risponderghe
Facendo el muto,
Come una piegora
324Togo su tuto;
Ma replicandome
Quela carogna
Cinque sie termini
328Che fa vergogna,
Perdia la budela
Me salta suso,
Orbo de colera
332Ghe pesto el muso,
E mando al diamberne
Co un simiton
Peruche, peteni,
336E anca el paron.
Dopo sto anedoto
Che gò contà
E che dal nonzolo
340Xè stà giustà,
El sposo prossimo
De mia sorela
Per nome Lazaro
344Torototela,
Raccomandandome
A tuti quanti
De Vusustrissima
348Me manda avanti.
Questa è la storia
Bela e sincera;
No ghè una virgola
352Che no sia vera.
El Conte Caparo
Senza avrir boca
Gera stà a goderse
356Sta filastroca,
E de cuor tenaro
De bona fede,
Del scarso numero
360Che a tuto crede,
Senza malizia
Lu riteneva
Per infalibile
364Quel ch'el diseva:
Penetratissimo
De aver sentio
Quante disgrazie
372Che l'à sofrio
El se determina
Sto bon Signor
De torse Mario
376Per servitor.
Per so salario,
Oltre le spese,
Dodese talari
380Ghe fissa al mese,
Imprometendoghe
Co fondamento
Qualche altra mandola
384Se'l sarà atento
Colmo de giubilo
Mario sul fato
Senza far computi
388L'aceta el pato.
Assicurandolo
Che'l cercherà
Meter in pratica
392Quelo ch'el sà;
Ch'el sarà vigile
E sempre atento,
Servo umilissimo
396Ogni mumento;
In suma el termina
La so protesta
Co dei spropositi
400Vestii da festa,
Disendo in ultima,
Drento ste porte
Spero de viver
404Sin a la morte.
Difati in pratica
L'à dimostrà
Che le so chiacole
408Sia verità,
E cativandose
Quel budelon
El cuor benefico
412Del so paron,
In breve termine
El gà la basa
D'esser el despota
416De quela casa.
El Conte Caparo
Credeva za
L'omo del secolo
420De aver trovà,
Che fusse savio,
Morigerato,
Per lu a proposito
424Che fusse fato;
Ma de caratere
Tuto al contrario
L'à dovù acorzerse
428Che gera Mario
Dal caso barbaro
Che ghe xè nato,
Che tanto strepito
432Quà e là gà fato.
Sina da zovene
L'avea per uso
Abonorissima
436De levar suso;
E una domenega,
Povaro sior,
Ch'el chiama al solito
440El servitor,
Sussura, strepita,
E sona e ciga:
Xè tuto inutile
444Ch'el se sfadiga;
Mario no capita
Quela matina,
Perchè el gà el diavolo
448Che lo strascina.
Disperatissimo
Povaro Conte
El monta in colera
452Da Rodomonte,
E se determina
De farse cuor,
Andando in tracia
456Del servitor;
Da la so camara
Sbalzando fora,
Xè stà un miracolo
460Che là nol mora,
Perchè un spetacolo
Se ghe presenta
Dei più teribili
464Che lo sgomenta:
Le supeletili,
L'arzentaria
Mario infamissimo
468Gà portà via;
El scrigno el smafaro
Gà fato in pezzi,
E senza strepito
472Gà levà i bezzi.
Pien de ramarico,
Pien de passion
Per la gran perdita
476Del megio e 'l bon,
Al Conte Caparo
La fantasia
Se ghe scombussola,
480L'è in frenesia;
El tristo Mario
Per vie nascoste
Cargo de talari
484Core le poste,
E la giustizia
Cerca chiaparlo,
Come ch'el merita
488Per castigarlo.
Che v'ò contà,
Che in ogni angolo
492S'à sparpagnà,
Serva de regola
A quei signori
Che fa gran calcolo
496Dei servitori.