La Protesta
|
Edission original: |
Marco Pescante, Saggio di poesie veneziane, Venezia, dalla tipografia di Luigi Plet, 1835 |
|
Fonte: |
| ← XIV. La più bela Dôna de Treviso | Edission e fonte ▼ | XVI. El Ritrato de Nina → |
Ode Safica
XV.
Se mi fosse paron del mondo intiero
Tel daria tuto a ti, dileta Nina.
Che mondo fortunà, soto el to impero,
4Bela regina!
In ti dala matina in fin la sera
El mondo adorarave el so tesoro,
Se godarave un'altra volta in tera
8L'età del'oro.
Chè ti, bona nel cuor, bela nel viso,
In tuta quanta ti degna d'amore,
Ti faressi del mondo un paradiso
12Col to splendore.
Ma se regina no ti xe del mondo,
(Benchè degna ti sii d'un regio nome)
Mi sempre tal te riconosso in fondo:
16Ascolta come.
Provar l'ardente amor, che per ti sento,
Mi no te posso co materia alcuna;
Mi da darte no go oro nè arzento,
20Per mia sfortuna.
(E pò! la to bel'anima, ch'el regno
Xe dela grazia e nobiltà, me pare
Che in ogni caso sdegnarave un segno
24Tanto volgare.)
El to poeta invece te presenta
Un cuor, che t'idolatra, e senza falo...
Dimelo, vita mia, zestu contenta
28De sto regalo?
Mi no lo so! ti ti me lassi incerto!...
Ma, dubioso siben dela mia sorte,
Protesto qua che t'amarò per certo
32Sin ala morte.
Dunque, Nina, del mio, che xe too, cuore
Ti ti xe la dolcissima sovrana...
Ma!... se pò grato no te xe el mio amore,
36La mia tirana.
Nina! disponi pur de tuto mi:
Ti me vederà andare in aqua, in fogo...
Quando se trata d'ubidire a ti
40L'è un spazzo, un zogo.
Ogni parola toa per mi l'è un bando,
El desiderio tuo xe la mia brama,
Ecetuà el teribile comando
44Che mi non t'ama.
E sarave possibile che tanto
Mi fosse desgrazià, ch'el to bel cuore
De vèderme a morir se dasse el vanto
48Nel mio dolore?...
Ah! nò, nol credo; ma bensì d'ognora
Vedendo la celeste to sembianza,
Eco, dirò, culìa che m'inamora,
52La mia speranza