La Lodola e la Tortora

Da Wikisource
Jump to navigation Jump to search

EPUB silk icon.svg EPUB  Mobi icon.svg MOBI  Pdf by mimooh.svg PDF  Farm-Fresh file extension rtf.png RTF  Text-txt.svg TXT
75%.svg
Qualità del testo: sto testo el xe conpleto, ma el gà ancora da vegner rileto.

[p. 206 modifica]

LA LODOLA E LA TORTORA.


Là tra i campi a la Fosseta,
     Una bela lodoleta,
     O in delassore, o in bemì
     4Cantuzzava tuto el dì.

La trilava con un gusto!
     La intonava cussì giusto!
     No gh'è un pelo da zontar;
     8Oe... la gera da magnar.
Ma in pochissima distanza
     Una tortora de Franza
     Fava intanto, con ardor,
     12Saveu cosa mo? l'amor.
Graziadio tortore e done
     Xe stae sempre fedelone
     Qua da l'Alpi; ma de là?
     16Eh! le ga la fedeltà...
Co le nasce in quei paesi,
     Sempre afabili e cortesi
     Le dà basi, e rendè vu
     20Fina al cuco e al pelachiù.
Questa in fati, agosto o magio
     Ghe n'ha vinti sul so fagio
     Tuto el dì per el coin
     24Che ghe stuzzega el morbin.
La carezza per averli
     Pronti sempre tordi e merli:
     La la zira cussì ben,
     28Che contenti la li tien.
Se ghe manca questo o quelo,
     La ga pronto el terz'oselo
     De riserva sul fìgher,
     32Che ghe fa da cavalier.
Qualche volta mo i se stufa,
     I taroca, i fa barufa,
     Nè finisce la question
     36Che i ghe dà qualche becon.
Ma la lodola tranquila
     Varda, ride, canta, trila;
     Tenta intanto, se la pol,
     40De imitar el russignol.
Giera squasi un'ora e mezza,
     Che su l'orlo d'una tezza
     La cantava: che farò?
     44Eurìdice dove andrò?
Mal apena la taseva,
     I cainegri rispondeva
     In coreto a quatro, a tre:
     48Eurìdice, oh Dio! non c'è!
Ma la tortora, che alora
     Stava giusto là dessora
     A le strete co un fasan,
     52«Eh, la dise, che bacan!

[p. 207 modifica]

Ò d'aver, l'è proprio bela!
     Sempre drio mo la capela?
     E a la lodola:» Ma scer,
     56Ne sorie vu un peu vu tér?
Che ve vegna la pivìa!
     Cantè sempre! mo de dia!
     Tuto quanto el santo dì
     60Cici-cicì, cici-cì.
Dove xe i vostri morosi?
     I mumenti xe preziosi,
     No la torna minga più
     64Saveu, fia, la zoventù.
Eh! da brava su, co sesto
     Fè l'amor e felo presto;
     Val più, cara, un baso o dò,
     68Che una risma de rondò. —
Me Madam, la ghe risponde,
     Sto discorso me confonde,
     No la vogio contradir,
     72Sarà el baso un elisir.
Vita mia, cuor mio, raise!
     Je me pam! Co la lo dise
     Sarà un zucaro panon
     76Per i oseli del bon ton.
Ma mi vivo a la carlona:
     No go sesto, no son bona;
     Je me san d'avoàr un cheur,
     80C'an scantan! s'è mon boneur.
Po m'ha dito una calandra,
     Che à viazà, che vien da Fiandra,
     Giusto gerì, là tra el fen,
     84Che quel dolce xe un velen.
Che l'amor fa tanti dani,
     Ch'el ne scurta fina i ani;
     Ch'el ne sbrega in pezzi el cuor,
     88Che l'è in soma un traditor.
Ste opinion, cussì, in contrasto
     Mi a deciderle no basto,
     E per tema de falar
     92Canto, e seguito a cantar;
Po, no sala? i gusti varia;
     Ela ecetera,... e mi un'aria.
     Lessè-ma xantè a mon es
     96Ma bel dam e c-l-on vu bes,
Spiritosa! seria, seria,
     Dise l'altra: — Che miseria!
     Xantè donc, xantè mam-zel,
     100E la spica un svolo in ciel.

El fasan ghe sbrissa drio,
     I se sconde, i va a far nio
     Nè s'à visto po mai più
     104Quola tortora a dar su.
L'à zirà la Trevisana,
     L'è passada in Padoana,
     In Polesene, in Friul
     108Co la coa tacada al cul:
Vogio dir co i so galanti
     Che tre al zorno tuti quanti
     S'à godesto el so antrètien
     112A do bechi col so ben.
Ma chi viaza su le piume,
     Sia mo istinto sia costume,
     Spesso senza volontà
     116Torna là dove l'è stà.
Cussì un dì, dies'ani dopo,
     Nel sentir sbarar un schiopo
     Là pochissimo lontan
     120La s'à tolto zo de man.
E tra i campi a la Fosseta
     Xe la tortora costreta,
     Da la fufa del fusil,
     124De salvarse in t'un fenil.
Là mo giusto in quel mumento
     Puf, un refolo de vento
     Buta... chi mo? indovinè;
     128Quela lodola a la fé.
Veramente in cao dies'ani,
     E qua e là gh'è dei malani,
     Ma no intendo dir perciò,
     132Che i sia eguali in tute dò.
Le fatezze xe sparie;
     Le xe a muso do scarpie;
     Ma la lodola, sior si,
     136La ga ancora... me capì...,
L'ochio vivo, el penin lesto,
     Le so alete, qualche resto
     De quel certo no so che,
     140Che xe bon fin che ghe n'è.
Ma la tortora gramazza
     Xe a dretura una scoazza,
     Gioba, strupia: un ospeal
     144No ga in cuzzo la so egual.
Le se varda fisse, fisse,
     Incantae come le bisse;
     Le voria pur saludar:
     148Ma ghe par e no ghe par.

[p. 208 modifica]

Pur la lodola cortese
     A la tortora francese
     Dise alfin: — «ah, Dieu merci!
     152Ma scer dam vus et issi
Giusto gieri ho cercà d'ela,
     Sala a chi mo? a so sorela.
     El non plu n'an savè rien.
     156Come stala? stala ben?
Vardè come el tempo svola!
     Me par gieri quando sola
     Con quel so monsù pison
     160Ga chiapà le convulsion.
Se ricordela quel zorno
     Co à dà suso quel cotorno?
     Che scenon sora el pomer
     164Con quel merlo forestier?
Mè a propo Madam! la scusa...
     Dove xeli; son confusa
     De trovarla qua cussì
     168Vo galan, vo bonsami? —
— Ah, ma scer! ah cara fìa!
     La risponde: l'è finia.
     Chi refusere de pleurs
     172Vis a vi de me malheurs?
Son qua strupia, tuta un grumo.
     Gusti, amici, tuto in fumo?
     I m'à tuti abandonà
     176Me dol tuto: fina là...
Go un tumor qua su sta spala,
     Go do bruschi soto un'ala,
     X'è la gal, x'è le bubon,
     180E xè crass voalà 'l pumon.
Voleu 'l resto? sentì el pezo.
     Crederessi mo? anca in mezo
     Ste delizie m'arde el cuor
     184El vesuvio de l'amor;
E a le curte, no gh'è ozelo
     Che se mova, o bruto, o belo,
     Che col vedo svolar su...
     188Ah!... coman vu portè vu?
— Mi, madam, matina e sera
     Son ancora quel che gera,
     Una zuca senza sal,
     192Ma no stago minga mal,
Perchè, vedela, è ben vero
     Che no go più el beco intiero;
     Za el s'aveva da fruar...
     196Ma el me serve a becolar.

Xe ben vero che me manca
     Qualche pena a l'ala zanca,
     Nè me rischio da sto april
     200Svolar più sul campanil.
Ma svolatolo, me tegno
     Oe per altro mi me inzegno...
     Dormo ancora sala po
     204Su quel rovere là zo.
Quel che un poco me ratrista
     Xe che, oimè, perdo la vista,
     Ma distinguo ancora ben
     208Tuti i osei che va e che vien.
Me fa pur malinconia
     Che da un mese so irochia,
     E co fazzo cici-cì,
     212Ah, madam: no son più mi
Ma per altro cussì vechia
     Graziadio go bona rechia,
     E co canta el russignol
     216So beata. Chi me pol?»

Traesto fora da Wikipèdia - L'ençiclopedia łìbara e cołaboradiva in łéngua Vèneta "https://vec.wikisource.org/w/index.php?title=La_Lodola_e_la_Tortora&oldid=39316"