La Libertà
|
Edission original: |
Giovanni Mazier, Passatempi de Tasi Nane, Venezia, Fratelli Visentini, 1894 |
|
Fonte: |
Indice:Mazier - Passatempi de Tasi Nane, Venezia, Visentini, 1894.pdf |
| ← El Congresso per la pace | Edission e fonte ▼ | La nomina d'un Deputato → |
Via mamalucchi
No ve acorzè
Che se se liberi
Parlar podè!
La nota placida
De contentessa
In cuor credemelo
I ve la messa.
Perchè ancor palidi
Ste co' quel muso?
La nota alegra
Tolè via suso.
Co se xe liberi
Comercio, arte
Presto risorge
Per ogni parte
No ghe più lagreme,
A seci i schei
Ve vien prestissimo
In mezo ai dei
Carta novissima
Pena stampada
Ve se calùma
A drio la strada.
Questa credemelo
Da ancùo a doman
La se trasforma
In talisman.
Monea vilissima
Xe oro e arzento,
La carta sola
Porta contento.
Per vostro massimo
Ben co' le tasse
I la fa metar
Drento le casse.
Richezza mobile,
Tassa esercizio,
Arte comercio,
Per tor el vizio
S'à messo subito
Dazi al petrolio
Ai vini ai spiriti
Che monopolio
Gera credemelo
In man de tanti
Che afari i fava
Da gran birbanti
Co' questo metodo
S'à rancurà
L'oro l'arzento
Per le cità.
Popoli liberi
Via ringrazïè
L'istituzion
Che ancùo ghe xe.
S'arma teribili
Fortezze navi
E per l'oceano
Se passa cavi.
Se spende facile
Quela monea
Tuta cartacea
Che ognuno crea.
No xe po' inutili
Opere spese
Per la difesa
De sto Paese!
Vedè che floride
Xe le cità
Come i comerci
Se gà slargà!
Vedè che stabili,
Che monumenti,
Che grandiosissimi
Porti florenti!
Vedè che industrie,
Che nova arte
Va propagandose
Per ogni parte!
Banche moltissime
Se istituisse,
E ghe xe i stupidi
Che no capisse
Che tuto è libero
In sto Paese
Dove Brighela
Paga le spese!
Via mamalucchi
No ve acorzè
Che se se liberi
Parlar podè!...