La Comission a l'ornato
|
Edission original: |
Giovanni Mazier, Passatempi de Tasi Nane, Venezia, Fratelli Visentini, 1894 |
|
Fonte: |
Indice:Mazier - Passatempi de Tasi Nane, Venezia, Visentini, 1894.pdf |
| ← I Liquori del Zorno | Edission e fonte ▼ | Un duelo fra do avocati → |
Se dixe se vocifera
Che in sta cità ghe sia
'Na comission d'ornato
Da poco istituìa
Che spiega in modo insolito
Atività saver,
Che de talento insoma
Par fassa un bel mestier.
Sì, la vedè inflessibile
In modo draconian
Dar ordeni spesissimi
Ancùo e anca doman.
Con modo sol dispotico
Ragiunger sa el so intento
Malgrado che se opona
Anca el Regolamento,
Del qual, tiro parentesi,
La se ne serve quando
Rason ed argomenti
A ela va mancando.
Questioni importantissime
Da ela vien risolte,
De riduzion fassade
Coi so balconi e porte.
Del Canalazzo in specie
E de la Piaza ancora
Molto la se ne ocupa
De quel ch'è messo fora.
Se mai a so' oci capita
De veder nova insegna
Senza so ordin messa
No ghe chi più la tegna
L'aplica senza scrupoli
'Na multa a quel gramasso
E a drio de quela l'ordene
Tirarla tosto abasso.
Anzi se no me sbaglio
Un ordin xe sta emesso
Che a tuti vegna tolto
El vecio avùo permesso.
Per questo fato insolito,
Per quela ordinazion
Xe nato nel Paese
'Na vera oposizion.
Che a generà moltissime
Cause coi detentori
De insegne molto vecie
Che aveva gran colori.
Intanto via dai pergoli
Dei nostri bei palazi
S'à visto tor carteli
Che gera dei sbegazi.
Ma un'inzegner intrepido
Spiegà ga resistenza
Tegnù ga su el cartelo
Ch'è proprio un'indecenza.
Mostrando co' tantissime
Sode rason d'estetica
Da far la comission
Da bile vegnir etica.
Ai consoli, a moltissimi
De la cità Istituti,
No se ga messo veto
Se li à lassadi tuti.
Ma dunque mo' lustrissimi
Che in comission ve fe'
Dixeme francamente
Come che la pensè.
Se pol usar franchissimi
Do pesi e do misure
Senza che alcun po' ziga
De tante sine cure!!
De dir lo lasso a vualtri!!
Se de assae belo e bon
S'à fato in sto Paese
Senza de Comission!..