I Liquori del Zorno
|
Edission original: |
Giovanni Mazier, Passatempi de Tasi Nane, Venezia, Fratelli Visentini, 1894 |
|
Fonte: |
Indice:Mazier - Passatempi de Tasi Nane, Venezia, Visentini, 1894.pdf |
| ← Una decision de Vigo | Edission e fonte ▼ | La Comission a l'ornato → |
No gh'è più stomeghi
Che tegna duro
Da che in sto mondo
Tuto xe impuro.
Se inventa farmachi
Novi liquori
Che spande grati
Mile e più odori
Se usa prenderli
Fin nei cafè
Tanto i xe semplici
E a bon marché.
China, rabarbaro
Fero, genziana,
Tuto se sorbe
Come una mana.
No gh'è pericolo
Che no se prenda
El so stomatico
Anca a marenda.
Aqua de Seltz
Umbra Nocera
Se raccomanda
Matina e sera.
Se vol i stomeghi
Streti da nodi
Per ingiotir
Perfin i ciodi.
Za co' quest'aria
Così malsana
Questi liquori
Po' toca e sana.
A ciò credendoghe
Pronti se ingiote
Perfin el sugo
De le carote.
Medici, chimici
Mostrà a co' fati,
Co' dei famosi
Certificati.
Che l'è stomatico
Quel tal liquor
Pel mal de stomego
E pel brusor.
Ch'el ve prepara
Pronta la strada
Per far gustosa
Una magnada.
Co' questo i stomeghi
Pol tegnir duro
Che xe abolio
Ciò che xe impuro.
Dunque è verissima
La conclusion
Che questo è un secolo
d'indigestion.