La Biondina sdrajà s'un canapè

by Gian Giacomo Mazzolà

3 VIII I cavei de Nina VII IX Gian Giacomo Mazzolà 1785 XVIII

soneti

Gian Giacomo Mazzolà ―  I cavei de Nina

VIII

1785

Edission original:	Collezione delle migliori opere scritte in dialetto veneziano, Volume quarto: Poesie di Gio. Giacomo Mazzolà e di Lodovico Pastò, a cura de Bartolommeo Gamba, Venezia, al negozio di libri all'Apollo, dalla Tipografia di Alvisopoli, 1817
Fonte:	Indice:Collezione delle migliori opere scritte in dialetto veneziano 4.djvu

←  VII

Edission e fonte ▼

IX  →

VIII

La Biondina sdrajà s'un canapè
     De erbesine e de fiori semenà
     Co una man ombra ai ochi la se fa;
     4L'altra al bel viso de sostegno xe.

La Drezza se ghe gera drezzolà,
     E l'aria dei Cavei fava gilè;
     Mi stava a contemplarla... che non è;
     8Svola Amor, e pian pian de drio ghe va.

I Cavei sparpagnai tra le so man
     Prima el ràncura, e 'l li fa in Drezza, e lu
     11De la so binda el ghe fa po un galan:

Partìo lu, vago a veder per stupor,
     E in quel galan ghe vedo scrito su:
     14Ohe ohe no me tochè che son d'Amor.