L'invito
|
Edission original: |
Berto Barbarani, I due canzonieri, Verona, P. Apollonio, 1917 |
|
Fonte: |
| ← El pianoforte | Edission e fonte ▼ | La bogonela → |
L'INVITO.
Nina, te piase i fighi co la gossa,
te piase l'ua tirada zo a bonora,
i paesani da la facia grossa
che te saluda e che te ciama: siora!
Te piase i gali da la gresta rossa,
i prà de verde, co una vaca mora,
el late fresco co la pana sora,
el crà, crà, delle rane ne la lóssa?1
Te piase le ciesete de i vilani,
i camposanti con un fià de muro,
la luna tonda che fa sgogne a i cani?
Quando che el cor te bate suto, suto,
te piase far l'amor tra 'l ciaro e 'l scuro?...
Vegni fora da mi, che quà gh'è tuto!
- Note
- ↑ lóssa: pantano.