L'imbriagon (Camillo Nalin)

Da Wikisource
Jump to navigation Jump to search

EPUB silk icon.svg EPUB  Mobi icon.svg MOBI  Pdf by mimooh.svg PDF  Farm-Fresh file extension rtf.png RTF  Text-txt.svg TXT
100 percent.svg
Qualità del testo: sto testo el xe stà trascrito e rileto.
←  L'ambizioso Edission e fonte ▼ La sentenza  →
[p. 28 modifica]
L'IMBRIAGON.


Un omo alquanto ruvido,
     De quei del tagio vechio,
     Che ghe bastava l'animo
     De beversene un sechio,

La sera el gera solito
     De andar a l'ostaria,
     Nè mai senza esser gnognolo
     Da là el vegniva via,

Za sempre col pericolo
     Essendo mezzo coto
     De andar a capitombolo,
     De farse el muso roto.

[p. 29 modifica]


Continuamente prediche
     Ghe fava so Muger
     Per veder de ridurselo
     A cosse del dover,

Disendoghe che a rischj
     Grandissimi el s'espone,
     E che 'l deventa el bagolo
     De tute le persone;

Che se sta vita el seguita
     El zorno vegnarà
     Che ancora fresco e zovene
     El vin lo coparà,

Portandoghe l'esempio,
     Che tanto va la sechia
     Al pozzo fin che 'l manego
     La lassa, opur la rechia.

[p. 30 modifica]


Lu alora senza perderse
     Ghe dise: — Muger mia
     Scaldada senza dubio
     Ti ga la fantasia:

Per mi no gh'è 'l pericolo
     Che ti prevedi ti,
     No perdo rechia o manego
     Se seguito cussì,

Perchè posso zurartelo
     Nè sera, nè matina
     Al pozzo no i me trapola,
     Mi vago a la cantina;

E sempre co sto metodo
     De viver te prometo
     A scanso de disordini
     Sta pur col to cuor quieto.

[p. 31 modifica]


Co s'à da far coi stolidi
     Che ghe n'è tanti al mondo
     No serve de metafore
     Bisogna parlar tondo.

Traesto fora da Wikipèdia - L'ençiclopedia łìbara e cołaboradiva in łéngua Vèneta "https://vec.wikisource.org/w/index.php?title=L%27imbriagon_(Camillo_Nalin)&oldid=52959"