L'ambizioso
|
Edission original: |
Camillo Nalin, Novelle in dialetto veneziano, Venezia, Tipografia Andreola, 1819 |
|
Fonte: |
| ← El viagiator | Edission e fonte ▼ | L'imbriagon → |
Un Signor de casa vechia
Pien de bezzi come 'l vovo
No faceva che pensarsene
4Ogni zorno una da novo;
Ignorante più de un rovere
Profondeva i so zechini
In sempiezzi d'ogni genere
8Da far rider i vicini;
El sperava, miserabile,
Col so modo de pensar
Acquistarse un nome celebre;
12Farse un omo singolar:
Sempre befe, sempre satire
El sofriva da la zente,
Nè gà valso mai le prediche
16De l'amigo, e del parente,
Che ustinà più assae de un aseno,
Pien de boria, de ambizion,
El saveva ben risponderghe: —
20Dei mii soldi so paron. —
Dopo tante e tante budele
S'à pensà sto bel talento
D'un gran fiume arente l'arzere
24De comprarse un casamento;
E po' a letere da scatola
Sora l'arco del porton
Ghe fa meter una lapide
28Che portava sta iscrizion.
In ste porte de delizia
Per qualunque sia motivo
No ghe deve, Dio delibera,
32Entrar gnente de cativo.
Tuti leze quel preambolo
Mala pena el xè sta fato,
Giudicando el proprietario
36De presenza mezzo mato.
El dì dopo, da un anonimo
Del paese gh'è sta scrito
Per burlarse de quel stolido
40Sto ridicolo quesito.
Se entrar gnente pol per massima
De cativo in sto porton,
Per che parte de la fabrica
44Entra drento el so paron?
Nu podemo da sto anedoto
Francamente argomentar
Che sogeto xè a la critica
48Chi vol farse singolar.