L'avocato del Torin
|
Edission original: |
Giovanni Mazier, Passatempi de Tasi Nane, Venezia, Fratelli Visentini, 1894 |
|
Fonte: |
Indice:Mazier - Passatempi de Tasi Nane, Venezia, Visentini, 1894.pdf |
| ← Ne l'ocasion che se magna un lievro coi amiçi | Edission e fonte ▼ | El Senser de Mestre → |
L'è un ometo in piena regola
Assae bravo de parlar
Ch'el rancura fin la fregola
Purchè l'abia a lavorar.
No 'l se vede storser naso
S'el difende un desperà,
Come un altro xe sto caso
Per la soa capacità.
El riceve tuti quanti
E da vero venezian
Che i sia pur anca birbanti
No 'l fa mai da zarlatan.
Lu xe un omo che ghe vede
Assae dentro a le question
Tanto è vero che i ghe crede
E che i vien in prussision.
Figureva a la matina
Al cafè de San Cassan
Fin de zente una dozzina
Sta spetarlo, che un bacan.
I fa proprio per do ore
Fin che arïva co' premura
El chiarissimo Dotore
Per andar a la pretura.
Là consulti magistrali,
Su do pie vien regolai,
El rimedio o dei cordiali
Se ghe trova a tuti i guai,
Ela vegna quà sta sera,
Ela speta domatina,
De la causa via la spera
Siora cara Meneghina.
Go trovà un bel spediente
Perchè el noto so aversario
No ghe possa far più gnente,
Ma me ocore el numerario.
La me daga per esempio
Diese lire che co' un'ato
Meto a posto mi quel sempio,
Comparir lo fasso mato.
E vu caro, i testimoni
Qua mandeme po' a le tre,
E sentir vogio anca Toni
Che so quanto debol xe.
Qua da bravo Ferdinando
Qua coragio mo' Agostin
Tre grapini mi comando
Del notissimo Torin.
Ed intanto che se beve
L'avocato vien ciamà
El se eclissa come neve
Ne se sa co'l vegnarà.
Ferdinando, el so compagno
Che se acorze de l'afar
Senza far nemanco un lagno
El Torin i va a pagar.
Co' una corsa za i lo ciapa
Via de troto su le scale;
Ma lu intanto la so capa,
Vulgo toga, el ga in le spale.
El discute co' un'audacia
Degna in ver de megio causa
E nol varda gnanca in facia
Fin che fato nol ga pausa.
El dirito e procedura,
Sia civil che criminal,
Co' 'na gran disinvultura
El maniza el comercial
Poche cause va perdue
Da sto celebre avocato
Le rason xe tute sue;
Ma ghe in lu un gran pecato,
Che finida la so aringa
Sostenuda co' decoro
Da là el sorte senza minga
El valor de un puro boro.
Ma sto omo de talento
Vien calando pian pianin
Al Cafè, che xe un portento,
Se nol beve el so Torin.
Come apena lu se senta
Un cliente novo ancora
A lu in bota se presenta
E lo tien per più d'un'ora.
Sti consulti da cafè
Che ve fa sprecar el fià,
Darli megio po' no xe
Ne la quete del mezà!
Sior dotor, sti privilegi
Torna a dano de la casta,
Tanto è vero che a sti pregi
Podè dir finora basta.
Gavè fioi, gavè famegia,
Servitù da mantegnir.....
Via da bravo la se svegia
La se fassa sovenir
Che nel mondo el galantomo
Per cogion no 'l xe passà,
No ghe barba no de omo
Ch'el talento abia donà.
No la daga più consulti
Per un strazo de Torin,
Perchè torse de sti insulti
Senza el gusto d'un quatrin.
La me creda che per regola
Magna poco chi che vol,
Contentarse de la fregola
A sti chiari bei del sol!