El Senser de Mestre
|
Edission original: |
Giovanni Mazier, Passatempi de Tasi Nane, Venezia, Fratelli Visentini, 1894 |
|
Fonte: |
Indice:Mazier - Passatempi de Tasi Nane, Venezia, Visentini, 1894.pdf |
| ← L'avocato del Torin | Edission e fonte ▼ | El pare dei poveri → |
Camina camina
Per ogni sentier....
Sì, noto xe a Mestre
Naneto Senser....
Al Genio el se vede,
Da Gigi al Vapor
Ch'el parla co' tuti
Co' un somo ardor.
El va po' al Progresso,
Sarà casa soa;
Ma scondar n' ol pol
Quel tanto de coa.
El va da le Muneghe
In quela contrada,
Ne ghe po' pericolo
Che 'l sbaglia mai strada.
Insoma sto omo
Nei dì de mercà
El vien dapertuto
In pressa ciamà
Voleù côla Banfi
Opur Ramassoti
Voleù Rovinazzi
O roba da goti?
Parlè co' sto omo
Che xe un gran portento,
L'è el vero senser
Che spiega talento.
Da lu fa recapito
Dei gran viagiatori,
Che merce prepara
De tuti i colori.
L'è un omo credeme
Quantunque assae picolo
Che gnente presenta
In lu de ridicolo.
Co' una gran batola
El porta la parte
E a casa el ve mena
Co una gran arte.
Xe là che 'l ve mostra
I veri campioni,
E che li magnifica
Co' gran paroloni.
Corè via da lu
Mostrè de saver
Chi sia l'imortale
De Mestre senser.