L'amnistia

Da Wikisource
EPUB   MOBI   PDF   RTF   TXT
Qualità del testo: sto testo el xe conpleto, ma el gà ancora da vegner rileto.
L'amnistia
1906

 Edission original:   

Albano Baldan, "Versi veneziani", 1906

 Fonte:

http://invenessian.blogspot.com/2010/03/albano-baldan.html

Edission e fonte ▼

Quel giorno là, capìssela, paron,
perché quel giorno gera nato ‘l Re,
ze arivà la mestìa, dopo le tre,
4e i me ga cassà fora de preson.

Mi paraltro m’ho messo a protestar;
go dito: “Che monàe ze ste qua?
Quando che in strada me gavè butà,
8mi no go da dormir, né da magnar.

Deme almanco do franchi, e alora ciò
me podarò rangiar al meno mal;
ma mi, sensa lombardi par la qual,
12no perdo sta cucagna; ah, questo no!”

Ma cossa conta? Un bògia de quei là...
El dise: “Uscite fuori, sacrenon!”
E po ‘l me sgnàca fora del porton,
16e queli ze sta i franchi che i ma dà.

Zeli bastardi o no, cossa ghe par?
E dir che infin li mantegnìmo nu,
parchè se n’altri no ghe semo più,
20ghe toca andar a ciche par magnar.

Ciò, mi no digo: la mestìa, paron,
par chi ga bessi la va ben, se sa;
ma par mi, che so sempre desparà,
24la mestìa ze co càpito in preson.

Perché, no conto fiabe, al Criminal
mi so sta come un papa, in verità;
e ghe scometo che se ‘l fusse là,
28gnanca lu, ‘l varda, nol staràve mal.

E po basta ch’el sapia questa qua:
el giorno de na festa prinsipal,
come sarìa de Pasqua o de Nadal,
32i ne parècia un piato profumà.

E salo che robeta che i ne dà?
Gnente altro che le paste col ragù!
El ghe starìa, mi calcolo, anca lu
36a magnar quela roba che ze là.

Anzi el varda: mi so sempre imbrogià,
e presto ze Nadal, el giorno bon;
dunque bisogna còrar in preson,
40parchè ghe ze ‘l pastisso parecià.

Come che fasso a farme menar su?
Ciapo na bala, po taco a sigar
fin che le guardie le me pol vantar;
44e magno le mie paste col ragù.

Traesto fora da Wikipèdia - L'ençiclopedia łìbara e cołaboradiva in łéngua Vèneta "https://vec.wikisource.org/w/index.php?title=L%27amnistia&oldid=42071"