L'Amore sublimato
|
Edission original: |
Collezione delle migliori opere scritte in dialetto veneziano, Volume secondo: Poesie di Antonio Lamberti, a cura de Bartolommeo Gamba, Venezia, al negozio di libri all'Apollo, dalla Tipografia di Alvisopoli, 1817 |
|
Fonte: |
Indice:Collezione delle migliori opere scritte in dialetto veneziano 2.djvu |
| Edission e fonte ▼ |
Sempre in quei tempi vechi che savè,
E che gnissun credè,
Ma che ghe sarà stai
Se de lori ne parla
Anca i libri stampai,
Ghe gera do Cavai
Un maschio, e st'altro femena
Che avendose incontrà
Al pascolo in t'un pra,
S'à ochià, s'à sfiorizà,
E dopo qualche smorfia
Un po de ben voler i s'à chiapà.
Sto amor ghe xe cressù
E i s'à amà che mai più;
Ma seguitando i moti
Che se dise del cuor,
O vero sia l'istinto,
Che n'à messo el Signor,
No ghe gera un quarelo
D'erba fresca e fioria
Dove no i se trovasse in compagnia.
Se una fontana chiara
In mezzo la campagna
Vedeva la compagna,
Gera in bota avisà
El so caro compagno,
Che l'andasse con ela a bever là.
Al Sol, a la frescura,
A l'erba, a la verdura,
E in ogni logo no ghe gera falo
Voleva la Cavala el so Cavalo.
Quando Amor invidioso
D'una tanta dolcezza,
Vien dito, che al Cavalo
Gabia impiantà na frezza,
E dopo esser ferio
El s'abia inasenio.
In fati el s'à sentio
Un no so che nel cuor,
Che sti siori platonici
Ghe va chiamando Amor.
Gh'à parso ch'el Cavalo,
Anemal valoroso,
Nobile, generoso,
No l'avesse d'amar
Cussì, senza stimar,
Senza trovar in tel amato ogeto
No so che de perfeto;
L'à donca stabilio
De amarla e de stimarla,
Ma nol podea spontarla,
Perchè la so Cavala
Gera bela, ben fata,
Afetuosa, garbata,
Andando de ghinea
La pareva una Dea,
Ogni passo la fava;
Ma debole de gamba
Che ogni fià la cascava,
(Difeto nei Cavai
Pezzo, per quel che i dise,
D'i altri cinque obligai)
E ghe gera un de più,
Che no la se voleva tegnir su,
Disendo, che Natura
La chiamava a cascar,
E che no la se ga da contrariar;
Che tuti i Cavai casca o poco o tropo
De troto o de galopo,
E che se forti in gamba
Tanti da nu se crede
Xe perchè no i se vede,
Perchè sti satraponi
Fa parer salti in fin i tomboloni.
Sto Cavalo imprudente,
Un dì ch'el gera ardente,
Ga dito a la Cavala:
Sapi che te amo assae,
Ma no de amor de stala;
L'è de quel fin che mai se possa dar,
Sapi, Cavala cara,
Che te vogio stimar.
No aveva la Cavala mai pensà
A sto amor sublimà,
Ma da lu recordà
Nel cuor se ga svegià
Un sentimento a sta sublimità;
E ga dito: Sior sì, vogio provar
Cossa che xe un amante
Che me sapia stimar,
E voltada al Cavalo
L'à dito: No far falo,
Sastu, stimime assae,
Perchè mi son de quele
Che à da esser stimae.
Ogni zorno che insieme
O i magnava, o i trotava,
O pur che i se sguazzava,
Ela ghe dimandava:
Caro cavalo mio,
Me stimistu? E 'l Cavalo
Ghe rispondeva: Oh Dio!...
Ela credeva Quanto!
E la se compiaseva de sto impianto.
Quando che un zorno alfin,
Dopo d'esserse stai ben da vicin,
La dise: Ti me stimi,
Cavalo, no xe vero?
Via parleme sincero. —
— Sì, cara, voi stimarte,
(Lu risponde) e adorarte. —
— Ti vol... donca al presente
No ti me stimi gnente. —
— Sì, ma sapi go un cuor
Indegno del to amor. —
— Eh! questi xe pretesti;
Curte, ti m'à da dir
Se veramente stima
Ti sa' per mi sentir.
Nol se pol più tegnir;
El ghe dise che 'l ga
Nel so cuor una gran contrarietà;
Ch'el vorave stimarla,
Ma ch'el sente per tuto a placitarla,
Fin dai so amici istessi
Per Cavala de gamba tropo lasca,
E che ogni quatro passi
La scapuzza o la casca,
E che lu stesso à visto
Far qualche sesto tristo,
Onde che lu voria
Vederla ben guaria,
E che la xe una cossa
Che la poderia far,
Basta che la se usasse a sostentar.
La s'à messo a zigar,
La ga trato scalzae,
E la ga fato mile cavalae;
E la ga dito: Porco,
Ti che ti xe più bruto assae de l'orco,
Che no ti è degno de tocarme un pelo,
Cussì ti pensi, e ti vol farme el belo?
Perchè da quatro strupi de Cavali,
O da qualche Cavala
Refudo d'ogni stala
Te vien dito de mi,
Subito porco, mulo,
Ti à da pensar cussì?
Impara a rispetarme,
Onorarme e stimarme
Se ti me vol amar,
Se no, mostro del Diavolo,
Vate a far gazerar.
Basta, l'à ben pregà,
E la scena quel zorno s'à giustà;
Ma da quel zorno in qua
Ghe xe sta barufete,
Museti, parolete,
Morsegae, scalzadine;
Dispeti, romanzine;
In soma, no i magnava quel bocon
Che prima, o vero dopo,
No i se avesse da dar un morsegon;
E tuto per l'afar
De amar e de stimar.
Quando quel dì teribile
S'à visto a capitar,
Che 'l Cavalo ga dito
Con un viso da aflito,
Che in tal logo, in tal ora, in tal zornada
L'à da 'na scapuzzada,
E che la xe cascada;
La fiaba è terminada,
Che in vista de sta racola
Convinta e indispetida la Cavala
La l'à scazzà per sempre da la stala.
Da sto strazzo de afar
Un moralista podaria cavar,
Che quei che vol star ben
Toga le cosse come che le vien.